Fýtbol: «Astana» ekinshi orynǵa kóterildi
NUR-SULTAN. QazAqparat - Búgin fýtboldan Premer-lıga komandalary arasyndaǵy Qazaqstan birinshiliginiń ekinshi týrynda elordalyq «Astana» óz alańynda Aqtaýdyń «Kaspıı» klýbyn qabyldady, dep habarlaıdy QazAqparat tilshisi.
Ótken týrda «Astana» Túrkistanda «Turanmen» 2:2, «Kaspıı» óz alańynda «Aqtóbemen» 1:1 esebimen teń túsken bolatyn.
Búgingi kezdesýde elordalyq klýb jeńiske jetýge bar kúshin saldy. Oıyn basynan qarsylas komanda qaqpasy mańynda jıi boı kórsetti. Nátıjesinde 17-mınýtta Maks Ebong mergendigimen kózge tústi. Al 46-mınýtta Marın Tomasov penaltıden múlt ketken joq.
Kezdesýde «Astana» qarsylasyn 2:0 esebimen tize búktirdi. Atalǵan jeńisinen keıin elordalyq klýb týrnır kestesinde ekinshi orynǵa kóterildi.
Sondaı-aq, búgin ekinshi týrda taǵy eki oıyn ótti. Óz alańynda «Taraz» Petropavldyń «Qyzyljarymen» 0:0 esebimen teń tússe, Qyzylordanyń «Qaısary» Almatynyń «Qaıratyna» 0:3 esebimen jeńilip qaldy.
Endi 20 naýryzda 14.00-de «Jetisý» (Taldyqorǵan) men «Turan» (Túrkistan), 16.00-de «Aqjaıyq» (Oral) men «Atyraý», «Shahter» (Qaraǵandy) men «Ordabasy» (Shymkent), 19.00-de «Aqtóbe» men «Tobyl» (Qostanaı) komandalary kezdesedi.
