Fýtbol: «Astana» bıylǵy maýsymda alǵash ret jeńilis tapty
ASTANA. QazAqparat - Búgin fýtboldan el birinshiliginiń segizinshi týrynda qos birdeı kútpegen nátıje tirkeldi, dep habarlaıdy QazAqparat tilshisi.
Temirtaýda Qaraǵandynyń «Shahteri» osyǵan deıin jeńilmeı kele jatqan «Astanany» qabyldady.
Bul oıynnyń taǵdyryn bir ǵana gol sheshti. 70-mınýtta qaqpanyń jaqtaýyna tıip, keri serpilgen dopty toqtatyp, qaıta tepken «Shahterdiń» quramyndaǵy chernogorııalyq legıoner Damır Koıashevıch óz múmkindigin paıdalana bildi. Bir qyzyǵy, D.Koıashevıch kezinde «Astana» quramynda oınaǵan bolatyn. Sóıtip burynǵy klýbynan osylaısha «ósh aldy».
«Astananyń» súrinýi muń eken, týrnır kestesinde elordalyqtardy ókshelep kele jatqan Almatynyń «Qaıraty» muny múlt jibergen joq. Almatylyqtar Taldyqorǵanda jergilikti «Jetisý» komandasyn 3:1 esebimen tize búktirdi. Bıylǵy chempıonattaǵy altynshy jeńisin toılaǵan «Qaırat» 20 upaımen kósh basyndaǵy «Astanaǵa» jaqyndaı tústi. Elordalyqtardyń qorjynynda 22 upaı bolǵanymen, olar bir oıyndy artyq ótkizdi. Demek, chempıondyq ataq úshin talas qyza tústi degen sóz.
Taǵy bir kútpegen nátıje «Tobyl» (Qostanaı) men «Qaısar» (Qyzylorda) komandalary arasynda tirkeldi. Osyǵan deıin úshinshi orynda kele jatqan, bıyl Eýropa lıgasyna joldama alǵan qostanaılyqtar óz alańynda qyzylordalyqtardan (0:3) oısyraı jeńilip, jankúıerleriniń aldynda jerge qarady.
Esesine Shymkentte Pavlodardyń «Ertisin» 1:0 esebimen utqan «Ordabasy» komandasy 16 upaımen úzdik úshtikke qaıta oraldy. Tórtinshi, besinshi satydaǵy «Tobyl» men «Shahterdiń» 13-ten upaılary bar.
Bul týrda «Atyraý» men «Aqtóbe» komandalary 1:1 esebimen teń tarqassa, Petropavldyń «Qyzyljary» óz alańynda «Aqjaıyqty» (2:1) utty.
Aıta keteıik, toǵyzynshy týr oıyndary Jeńis kúni - 9 mamyrda ótedi. Bul kúni «Aqtóbe» - «Jetisý», «Aqjaıyq» - «Atyraý», «Astana» - «Qyzyljar», «Qaısar» - «Shahter», «Ertis» - «Tobyl», «Qaırat» - «Ordabasy» komandalary ózara kezdesedi.
Sonyń ishinde ázirge altynshy orynda kele jatqan batysqazaqstandyqtar aldaǵy kezdesýin Oralda, P.Atoıan atyndaǵy stadıonda ótkizedi.
Buǵan deıin «Aqjaıyq» komandasynyń qosalqy stadıonyndaǵy jasandy alań jaramsyz bolǵandyqtan, oraldyqtar óz alańyndaǵy oıyndaryn Aqsaı qalasynda ótkizip kelgen bolatyn. «Qarashyǵanaq» stadıonynda Vladımır Mazıardyń shákirtteri el birinshiliginde úsh match ótkizip, sonyń ekeýinde jeńiske jetip, bireýinde teń tústi. Al Qazaqstan kýbogy úshin oıynda dál osy atyraýlyqtarǵa ese jiberdi. Endi aldaǵy básekeniń de qyzý ótetini anyq.
