Fýtbol: «Astana» alǵashqy týrda «Turanmen» teń tústi
NUR-SULTAN. QazAqparat - Búgin fýtboldan Premer-lıga komandalary arasyndaǵy Qazaqstan birinshiliginiń alǵashqy týrynda úsh oıyn ótti, dep habarlaıdy QazAqparat tilshisi.
El birinshiligin Almatyda jergilikti «Qaırat» pen Taldyqorǵannyń «Jetisý» komandalary arasyndaǵy kezdesý ashty. Ótken jylǵy el chempıony qarsylasynyń osal tusyn taba bildi. Olardyń qatarynan Neboısha Kosovıch 69, Gýljigit Alyqulov 72-mınýttarda kózdegen nysanadan múlt ketken joq. Nátıjesinde almatylyq klýb 2:0 esebimen basym tústi.
Taǵy bir kezdesý Túrkistan qalasynda ótkizildi. Jergilikti «Turan» elordalyq «Astana» klýbymen sheberlik baıqasty. Oıyn barysynda elordalyq Marın Tomasov 9-mınýtta esep ashsa, túrkistandyq Tańat Nóserbaev 18-mınýtta tarazy basyn teńestirdi. Al 54-mınýtta Abzal Beısebekov soqqan goldan keıin «Astana» taǵy da alǵa shyqsa, 68-mınýtta túrkistandyq Mardan Tólebek qorytyndy esepte belgiledi. Oıyn 2:2 esebimen teń aıaqtaldy.
«Atyraý» komandasy óz alańynda Qaraǵandynyń «Shahter» klýbyn qabyldady. Oıyn taǵdyryn qaraǵandylyq klýb sapynan Vıtalıı Balashov 14-mınýtta soqqan jalǵyz gol sheship, kenshiler 1:0 esebimen jeńiske jetti.
Endi 14 naýryzda birinshi týrdaǵy qalǵan tórt oıyn bolady. Aldymen 15.00-de «Kaspıı» (Aqtaý) men «Aqtóbe», «Ordabasy» (Shymkent) men «Qyzyljar» (Petropavl), 17.00-de «Qaısar» (Qyzylorda) men «Taraz», «Tobyl» (Qostanaı) men «Aqjaıyq» (Oral) komandalary sheberlik baıqasady.