Fýtbol: «Astana» «Aqjaıyqty» utyp, upaı sanyn 30-ǵa jetkizdi
ORAL. QazAqparat - Fýtboldan premer-lıga komandalary arasynda Qazaqstan chempıonatynyń kezekti týrynda birinshilik kóshin bastap kele jatqan «Astana» komandasy Oralda «Aqjaıyqty» 2:0 esebimen utty, dep habarlaıdy «QazAqparat» tilshisi.
Bul - «Aqjaıyqtyń» bıylǵy maýsymdaǵy óz alańyndaǵy birinshi jeńilisi. Vahıd Masýdovtyń shákirtteri qansha tyrysqanymen, sheberlikteri áldeqaıda basym qonaqtardyń mysyn basa almady. Aldymen 60-mınýtta Ivan Maevskıı mergendik tanytty. 69-mınýtta «Aqjaıyqtyń» qorǵaýshysy, chernogorııalyq Iovan Nıkolıchke ekinshi eskertý qaǵazy kórsetilip, alańnan qýylǵannan keıin kóp uzamaı Roman Mýrtazaev esepti 2:0-ge jetkizdi.
Sóıtip, osy týrdan keıin upaı sanyn 30-ǵa jetkizgen elordalyqtar burynǵysha birinshi orynda nyq tur. Odan bir oıyny artyq Shymkenttiń «Ordabasy» komandasy bul joly óz alańynda aqtóbelikterdi 2:1 esebimen tize búktirdi. Birinshi taımda Erkebulan Tuńǵyshbaev pen Tańat Nóserbaev shymkenttikterdiń mereıin asyrsa, «Aqtóbe» quramyndaǵy brazılııalyq legıoner Iýrı Mamýte oıyn sońyndaǵy qosymsha mınýtta ǵana esepti qysqarta aldy.
26 upaımen «Ordabasy» týrnır kestesindegi ekinshi ornyn saqtap qalsa, úshinshi satydaǵy Almatynyń «Qaıraty» da onsha qınala qoıǵan joq. Olar óz alańynda «Tarazdy» 4:0 esebimen (gol avtorlary - Baýyrjan Turysbek, Jerar Goý, Barboza Isael, Baýyrjan Islamhan) oısyrata utyp, kezekti úsh upaıyna qol jetkizdi. Qostanaıdyń «Tobyly» óz alańynda Vladımır Mýhanov «Aqtóbege» ketip, bas bapkersiz qalǵan Kókshetaýdyń «Oqjetpesin» 5:1 esebimen kúırete jeńdi. «Tobyldan» Alekseı Şetkın qos goldyń avtory atansa, Grıgorıı Sartakov, Djordje Despotovıch, Raýl Djalılov ta alańnan qur ketken joq. «Oqjetpesten» Lýkas Horvat qana bir gol soǵa aldy. Osylaısha, 24 upaı jınaǵan «Tobyl» tórtinshi orynǵa kóterildi. Pavlodarda «Atyraýmen» 1:1 esebimen (Aleksandr Kıslıtsynnyń golyna ekinshi taımda atyraýlyq ıÝre Obshıvach jaýap berdi) teń oınaǵan «Ertis» 21 upaımen besinshi satyǵa syrǵydy. Al Qaraǵandynyń «Shahterinen» 2:1 esebimen basym túsken Qyzylordanyń «Qaısary» 18 upaımen altynshy orynda keledi. Bul oıynda qonaqtardan Marko Stanoevıch birinshi taımda esep ashqanymen, olar sol basymdylyqty ustap tura almady. Ekinshi taımda Eljas Altynbekov pen Valerıı Korobkın «Qaısarǵa» jeńis áperdi.
Kelesi týrda «Aqtóbe» - «Ertis», «Taraz» - «Tobyl», «Atyraý» - «Aqjaıyq», «Oqjetpes» - «Ordabasy», «Qaısar» - «Qaırat», «Astana» - «Shahter» komandalary ózara kúsh synasady.
FOTO: sports.kz
