Fýtbol: Kabo-Verdeni áreń jeńgen Argentına álem chempıonatynyń 1/8 fınalyna shyqty
ASTANA. KAZINFORM – Argentına quramasy AQSh-tyń Maıamı qalasynda ótken fýtboldan álem chempıonatynyń 1/16 fınalynda Kabo-Verdeni 3:2 esebimen jeńip, týrnırdiń 1/8 fınalyna joldama aldy, dep habarlaıdy FIFA.
Kezdesýdiń 29-mınýtynda Argentına kapıtany Lıonel Messı esep ashyp, komandasyn alǵa shyǵardy. Kabo-Verde tarapy tarazy basyn teńestirgenimen, ońtústikamerıkalyq qurama oıyn tizginin qaıta qolǵa alyp, taǵy eki ret mergendik tanytty.
Kabo-Verde match sońyna qaraı esep aıyrmasyn qysqartqanymen, tarazy basyn teńestire almady. Nátıjesinde Argentına 3:2 esebimen jeńiske jetip, pleı-offtyń kelesi kezeńine ótti.
Bul matchta Lıonel Messı álem chempıonattarynyń pleı-off kezeńindegi nátıjeli áreketter sany boıynsha jańa rekord ornatty. Ol gol soǵyp, álem chempıonattary pleı-offyndaǵy nátıjeli áreketter sanyn 12-ge jetkizdi. Osylaısha argentınalyq fýtbolshy buǵan deıin 11 nátıjeli áreketpen kósh bastap turǵan Pele men Kılıan Mbappeden ozyp shyqty.
Sonymen qatar bul gol Messı úshin álem chempıonaty-2026 týrnırindegi jetinshi, al álem chempıonattary tarıhyndaǵy 20-gol boldy.
Endi Argentına quramasy 1/8 fınalda Mysyr quramasymen kezdesedi.
Aıta keteıik, Aýstralııany jeńgen Mysyr quramasy álem chempıonatynyń 1/8 fınalyna joldama aldy.
