Fýtbol: Argentına, Gollandııa jáne Brazılııa álem chempıonatynyń 1/8-shi fınalyna shyqty
ASTANA. Maýsymnyń 21-i. QazAqparat /Ernur Aqanbaı/ - Ońtústik Afrıka Respýblıkasynda ótip jatqan fýtboldan XIX álem chempıonatynda Argentına, Gollandııa jáne Brazılııa quramalary toptyq týrnır aıaqtalmastan jatyp 1/8-shi fınalǵa shyǵyp qoıdy.
Bul komandalardyń barlyǵy óz toptaryndaǵy alǵashqy eki matchta qarsylastarynan basym tústi, sóıtip 6 upaı jınap kelesi kezeńniń joldamasyna ıe boldy. Máselen, «V» tobynda óner kórsetetin Argentına quramasy Nıgerııany 1:0, Koreıany 4:1 esebimen jeńse, «E» tobynda oınaıtyn Gollandııa Danııadan 2:0, Japonııadan 1:0 esebimen basym tústi. Al, «G» tobynda synǵa túsip jatqan álemniń bes dúrkin chempıony Brazılııa quramasy toptyq týrnırdegi birinshi oıynynda Soltústik Koreıany 2:1, al ekinshi kezdesýinde Kot d Ivýardy 3:1 esebimen tize búktirdi.
«V» tobynan Argentınanyń izin ala kelesi kezeńge shyǵýǵa Koreıanyń múmkindigi mol. Ázirshe 3 upaıy bar olar sońǵy oıynyn áli birde-bir upaı jınamaǵan Nıgerııamen ótkizedi. Sondaı-aq, bul topta Grekııa quramasy da kelesi kezeńge shyǵý múmkindigin saqtap qaldy. Olar toptyq týrnırdegi sońǵy matchyn Argentınamen ótkizedi. Al, «E» tobynda Gollandııadan keıingi ekinshi orynmen kelesi kezeńge shyǵý úshin Japonııa men Danııa quramalary talasatyn bolady. Bulardyń árqaısynda úsh upaıdan bar. Al, qalǵan toptarda 1/8-shi fınalǵa beriletin joldamanyń taǵdyry toptyq týrnırdegi sońǵy matchtarda anyqtalatyn bolady.
