Fýtbol: Andreı Tıhonov resmı túrde «Astana» bas bapkeri qyzmetinen ketti
NUR-SULTAN. QazAqparat - Reseılik maman Andreı Tıhonov elordalyq «Astana» komandasy bas bapkeri qyzmetinen ketti, dep habarlaıdy QazAqparat tilshisi.
Bul jóninde komandanyń baspasóz qyzmeti málim etti.
Andreı Tıhonov 2020 jyldyń qazan aıynan bastap bas bapker qyzmetine kirisken edi. Byltyr «Astana» el birinshiliginde qola alsa, bıyl kúmis júldege qol sozdy.
Elordalyq klýbty aldaǵy Qazaqstan kýbogy oıyndaryna buryn bapkerdiń kómekshisi bolǵan Vladımır Ejýrov jetekshilik jasaıdy.
Aıta ketsek, 29-týrdaǵy «Astananyń» Almaty qalasynda «Qaırat» komandasyna qarsy ótkizgen kezdesýinde oıyn bitpesten elordalyq fýtbolshylar tóreshi sheshimine narazy bolyp, alańdy tastap ketip qaldy. Keıinnen olar jasyl alańǵa qaıta oralǵanymen Qazaqstan fýtbol federatsııasy mundaı jónsizdikke jol bergen bas bapker Andreı Tıhonovty el aýmaǵynda eki jyl boıy qyzmet atqarýyna tyıym saldy.
