Fýtbol álemniń áıgili trofeıi Qazaqstanǵa keldi
ALMATY. KAZINFORM – Fýtboldan álem chempıonatynyń kýbogi Almatyǵa keldi.
Qatań kúzetpen jetkizilgen fýtboldan álem chempıonatynyń kýbogi Almatynyń Respýblıka saraıynda tanystyryldy. Saltanatty rásimge 2006 jyly Italııa qurama sapynda álem chempıony atanǵan Marko Materatstsı qatysty.
Qala turǵyndary men qonaqtary álemdegi eń tanymal sporttyq trofeılerdiń birin jaqynnan kórý múmkindigine ıe boldy. Іs-sharaǵa qyzyǵýshylyq joǵary bolyp, barlyǵy 3500 astam adam qatysty. Bir qyzyǵy - salmaǵy 6,142 kg bolatyn, taza altynnan jasalǵan álem chempıonatynyń túpnusqa kýbogine dástúr boıynsha tek álem chempıondary men memleket basshylary ǵana qol tıgize alady.
- FIFA fýtboldan álem chempıonatynyń túpnusqa kýbogyn jáne álemdik fýtbol ańyzyn Almatyda qabyldaý – qalamyz úshin úlken mártebe. Almaty dástúrli túrde Qazaqstannyń sport ortalyǵy sanalady. Al basty fýtbol trofeıiniń kelýi qalanyń iri halyqaralyq sporttyq is-sharalardy ótkizý alańy retindegi mártebesin nyǵaıta túsedi, - dedi Almaty ákimdiginiń ókilderi.
Al ańyz fýtbolshy Marko Materatstsı álem kóz tigetin aldaǵy týrnırde kim favorıt ekenin aıtty.
- Men ıtalııalyqpyn, sondyqtan jeńis Italııaǵa buıyrady dep senemin. Biraq obektıvti túrde aıtsaq, chempıonnyń kim bolatynyn aldyn ala boljaý óte qıyn. Argentına, kóbine Leo Messıdiń arqasynda tamasha nátıjeler kórsetip júr. Brazılııa men Germanııa da árqashan myqty — olardyń tájirıbesi mol. Degenmen Marokko, Ispanııa jáne Portýgalııa syndy komandalar tańǵaldyrýy múmkin dep oılaımyn. Olardyń oıyn júıesi jaqsy uıymdastqan jáne kýbok úshin talasýǵa shynaıy múmkindikteri bar, - dedi fýtbolshy.
Álem chempıonaty bıyl 11 maýsym men 19 shilde aralyǵynda AQSh-tyń Atlanta, Boston, Dallas, Hıýston, Kanzas-Sıtı, Los-Andjeles, Maıamı, Nıý-Iork, Fıladelfııa, San-Frantsısko, Sıetl, Kanadannyń Toronto, Vankýver jáne Meksıkanyń Gvadalahara, Mehıko, Monterreı qalalarynda ótedi. Alǵash ret dúbirli dodada 48 qurama baq synaıdy.
Eske salaıyq, FIFA 2026 jylǵy álem chempıonaty bıletterine rekordtyq 500 mıllıonnan astam ótinim túskenin jarııalady.