FÝTBOL: Álem quramasy - Almatyda (FOTO)
ALMATY. QazAqparat- Fýtboldan Álem quramasynyń oıynshylary túngi reıspen Almatyǵa ushyp keldi. Lýısh Fıgý, Fabıo Kannavaro, Paolo Maldını, Alessandro Nesta, Andreı Shevchenko, Haver Sanettı, Klarens Zeedorf, Edgar Davıds, Iens Lemann, Franchesko Toldo, Dýaıt Iork, Serjıno, Krıstıan Verı, Krıstıan Panýchchı, Serjıno jáne basqa da oıynshylardy áýejaıda fýtbol jankúıerleri zor qýanyshpen qarsy aldy, dep habarlaıdy «Qaırat» fýtbol klýbynyń baspasóz qyzmetinen.
Keıbir jankúıerler ózderiniń pir tutatyn fýtbolshylarymen sýretke túsip te úlgerdi. Tipti olardy qonaq úıge deıin shyǵaryp salǵandar da boldy.
Esterińizge sala ketelik, búgin Almaty qalasynyń Ortalyq stadıonynda «Qaırat» fýtbol klýbynyń aty ańyzǵa aınalǵan oıynshylarymen Álem qurama komandasy arasynda qaıyrymdylyq joldastyq kezdesý ótedi. Bul «Juldyzdar matchy» «Qaırat» fýtbol klýbynyń qurylǵanyna 60 jyl tolýyna arnalady.
Oıyn keshki saǵat 20:00-de bastalady. Al onyń aldynda saǵat 19:00-de match aldynda kontserttik shoý bolady.
Sonymen qatar, búgin 17:00-de komandalardyń bas jattyqtyrýshylary men oıynshylarynyń qatysýymen baspasóz máslıhaty ótedi.
Bıletter áli satylymda bar jáne olardy tek Ortalyq stadıonnyń kassalarynan ǵana alýǵa bolady.
Sonymen, Premium VIP - 40 000 teńge, VIP - 20 000 teńge, D lojasy - 10 000 teńge, E lojasy 10 000 teńge, Batys trıbýna - 7 500 teńge, Shyǵys trıbýna - 5 000 teńge, Soltústik trıbýna - 3 000 teńge, Ońtústik trıbýna - 3 000 teńge.
