FÝTBOL: Álem chempıonatynyń irikteý oıyndary aıaqtaldy

Tartysqa toly ótken tórt kezdesý de jankúıerler kóńilinen shyqty.
Rýmynııa - Grekııa 1:1
Mıtroglý, 23 (0:1), Torosıdıs - avtogol, 55 (1:1)
Birinshi bolyp bul kúni jasyl alańǵa Rýmynııa men Grekııa quramalary shyqty. Alǵashqy matchta 3-1 esebimen grekterdiń mereıi ústem bolǵan edi, sondyqtan rýmyndar óz jankúıeriniń aldynda jerge qarap qalmaýǵa tyrysty. Degenmen alǵash bolyp grekter esep ashty: birinshi matchtyń qaharmany Mıtroglýdyń osy joly da qanjyǵasy maılandy. Ekinshi taımnyń basynda grekterdiń qorǵaýshysy Vasılıs Torosıdıs óz qaqpasyna dop soǵyp, qorytyndy esepti belgiledi. Eki match qorytyndysy boıynsha Grekııa Mýndıalǵa joldama aldy.

Horvatııa - Islandııa 2:0
Mandjýkıch, 27 (1:0), Srna, 48 (2:0)
Ekinshi match Zagrebte ótti. Eýropadaǵy irikteý týrynyń basty sensatsııasy atanǵan Islandııa Horvatııaǵa qonaqqa keldi. Alǵashqy matchta esep ashylmaǵan bolatyn, sondyqtan syrt alańda teń túsken horvattardyń favorıt sanalǵany túsinikti. Oıynnyń 27-mınýtynda «Bavarııa» shabýylshysy Marıo Mandjýkıch Horvatııany alǵa shyǵardy. Alaıda araǵa on mınýt ótkende Mandjýkıchtiń júıkesi syr berip, surmergen alańnan qýyldy. Degenmen, horvattar nátıjeni saqtap qana qoımaı, esepti eseleı tústi. Darıo Srna ekinshi doptyń avtory atandy.

Shvetsııa - Portýgalııa 2:3
Ronaldý, 50 (0:1), Ibragımovıch, 68 (1:1), Ibragımovıch, 72 (2:1), Ronaldý, 77 (2:2), Ronaldý, 79 (2:3)
Shvetsııada ótken matchty jankúıerlerdiń erekshe kútkeni belgili. Óıtkeni, birinshiden, alańǵa eki shabýyldaýshy komanda shyǵyp, kim myqtyny anyqtaıdy. Ekinshiden, bul ujymdardy bıylǵy jylǵy úzdik fýtbolshy atanýǵa úmitker qos juldyz - komandalardyń kapıtandary Zlatan Ibragımovıch pen Krıshtıaný Ronaldý bastap shyǵady. Tórtkúl dúnıeniń jankúıerleri kóz tikken oıyn eki shabýylshynyń teketiresine aınaldy. Zlatannyń qos dobyna «Realdyń» shabýylshysy het-trıkpen jaýap berdi. Sóıtip, portýgaldyqtar Brazılııaǵa joldamany qaltaǵa saldy. Aıta keterligi, eki matchta shvedter qaqpasyna soǵylǵan tórt doptyń barlyǵy da Ronaldýdyń enshisinde. Bir ókinishtisi, endigi jyly jazda Álem chempıonatynda Zlatan Ibragımovıchti kóre almaımyz.

Frantsııa - Ýkraına 3:0
Saho, 22 (1:0), Benzema, 34 (2:0), Gýsev, 72-avtogol (3:0)
Tórt kún buryn Kıevte azýly frantsýzdardy eki dop aıyrmasymen utqan ýkraındar Álem chempıonatyna baratyn keremet múmkindikten aıyrylyp qaldy. Jaǵdaıdyń qıyn ekenin sezgen Dıde Desham shákirtteri óz jankúıerleri aldynda namysqa tyrysyp baqty. Salǵan jerden qarsylas qaqpasyna lap bergen Rıberı bastaǵan top birinshi taımnyń ózinde-aq qos match qorytyndysy boıynsha esepti teńestirdi. Qorǵaýshy Mamadý Saho men Kárim Benzema qarsylas qaqpasyn dál kózdegen bolatyn. Al ekinshi taım bastalysymen Evgenıı Hacherıdı ekinshi sary qaǵazyn alyp, alańnan qýylǵannan keıin ýkraındyqtardyń jaǵdaıy odan saıyn aýyrlaı tústi. Frantsııa mundaı múmkindikti múlt jibermedi - sheshýshi úshinshi dop Oleg Gýsevtiń avtogoly bolyp jazyldy. Sóıtip 1998 jylǵy álem chempıondary keler jyly sol jetistikterin qaıtalap kóredi.
Aıta keteıik, osy ýaqytta Álem chempıonatyna joldama alǵan 30 komanda belgili. Olar: Ońtústik Amerıkadan - Brazılııa (jarys qojaıyndary), Argentına, Kolýmbııa, Chılı, Ekvador; Soltústik Amerıkadan - AQSh, Kosta Rıka, Gondýras; Azııadan - Japonııa, Ońtústik Koreıa, Avstralııa, Iran; Afrıkadan - Nıgerııa, Kot d`Ivýar, Kamerýn, Gana jáne Aljır; Eýropadan - Germanııa, Italııa, Anglııa, Ispanııa, Gollandııa, Reseı, Belgııa, Bosnııa jáne Gertsogovına, Shveıtsarııa, Frantsııa, Portýgalııa, Horvatııa jáne Grekııa. Qalǵan eki joldamany Ýrýgvaı men Iordanııa, Meksıka men Jańa Zelandııa sarapqa salýda. Alaıda qarsylastar qaqpasyna bes doptan soqqan Ýrýgvaı men Meksıka Brazılııaǵa bılet ala berse bolatyn sekildi.