FÝTBOL: Álem chempıonattarynyń rekordshysy Qazaqstan men Býrkına-Faso arasyndaǵy oıynǵa tórelik etedi
ASTANA. QazAqparat - Qazaqstan men Býrkına-Faso ulttyq quramalary arasyndaǵy joldastyq matchqa ózbek referı Ravshan Irmatovtyń jetekshiligindegi sýdıalyq brıgada tórelik jasaıdy. Bul týraly Qazaqstan fýtbol federatsııasynyń baspasóz qyzmetinen habarlady.
Aıta keterligi, Irmatov halyqaralyq tájirıbesi óte joǵary tóreshilerdiń biri sanalady. Máselen, ol 2010, 2014 jyldardaǵy Álem chempıonatynyń fınalyna, 2012 Olımpıada oıyndarynyń aqtyq kezdesýlerine, Azııa Kýbogy men klýbtar arasyndaǵy Álem chempıonatyna tórelik etken tanymal ári bilikti referı. Sonymen qatar 37 jastaǵy arbıtr Álem chempıonattarynyń matchtaryna qyzmet etý kórsetkishterinen rekord jasaǵan birden bir tóreshi. Máselen, ol osyndaı deńgeıdegi aıtýly oıyndarda, atap aıtqanda, 2010 jylǵy Álem chempıonattarynda - 5, 2014 jylǵy chempıonatta 4 kezdesýge qazylyq etti.
«Ózbek tóreshi buǵan deıin Qazaqstannyń ulttyq quramasymen ótken eki matchta qyzmet kórsetti. 2007 jyly ol Alma-TV kýbogy boıynsha Shymkentte ótken Qazaqstan men Qyrǵyzstan arasyndaǵy oıynǵa tórelik etti. Al 2010 jyly Qazaqstan men Oman arasyndaǵy joldastyq kezdesýge qatysty. Bul joly Irmatovqa qaptaldan kómektesetinderdiń biri onyń jerlesi Djahangır Saıdov, ekinshisi - qyrǵyz sýdıasy Bahadyr Kochkarov bolyp otyr. Al qazaqstandyq sýdıa Aleksandr Álıev rezervtegi tóreshi retinde taǵaıyndalǵan», delingen baspasóz baıanynda.
Eske sala keteıik, Qazaqstan men Býrkına-Faso arasyndaǵy match 12 mamyrda saǵat 18:00-de Almatynyń ortalyq stadıonynda ótedi.
