Fýtbol: Alekseı Shpılevskıı «Qaırattan» ketti
NUR-SULTAN. QazAqparat – Belarýs mamany Alekseı Shpılevskıı el chempıony Almatynyń «Qaıratynan» ketti, dep habarlaıdy QazAqparat tilshisi.
«Qaırat» fýtbol klýbynyń baspasóz qyzmeti málim etkenindeı, A.Shpılevskıı komandada bas jattyqtyrýshy mindetin 2,5 jyl boıy atqardy.
A.Shpılevskıı Germanııada Býndeslıganyń ekinshi dıvızıonynda óner kórsetetin «Ertsgebırge» fýtbol klýbynyń bas bapkeri bolyp taǵaıyndaldy.
«Qaıratpen» kelisimsharttyń merziminen buryn úzilýine baılanysty almatylyq komanda «Ertsgebırge» klýbynan ótemaqy alatyn bolady.
«Qaırattyń» ýaqytsha bas bapkeri mindetin qazaqstandyq maman Kırıll Keker atqarady. Ol bıylǵy maýsymda «Qaırat-Jastardyń» basshylyǵyna kelgen bolatyn. Sondaı-aq jastar komandasyn akademııa bapkeri Kırıll Morýnov jattyqtyratyn boldy.
Aıta keteıik, ótken jyly A.Shpılevskııdiń basshylyǵymen «Qaırat» el chempıony atanǵan edi.
