Fýtbol alańyna júgirip shyqqan jigit «Astanaǵa» 2 mln teńge tóleıdi
ASTANA. QazAqparat - Match kezinde fýtbol alańyna júgirip shyqqan jigit «Astana» klýbyna 2 mıllıon teńgege jýyq soma tóleıdi. Astana qalasynyń Almaty aýdandyq soty osyndaı sheshim shyǵardy, dep habarlaıdy QazAqparat klýbtyń saıtyna silteme jasap.
Astana qalasy Almaty aýdandyq sotynyń sheshimi boıynsha fýtbol buzaqysy Shamsýllo Faızıev «Astana» klýbyna 1 968 150 teńge tóleýi tıis.
Eske sala ketsek, 2017 jyly 23 qazanda elordadaǵy «Astana Arena» stadıonynda «Astana» men «Vıllıarrealom» arasyndaǵy (Ispanııa) ÝEFA Eýropa Lıgasy toptyq kezeńiniń matchynda Shamsýllo Faızıev buzaqylyq nıetpen alańǵa júgirip shyǵyp, matchqa kedergi keltirmek bolǵan.
Osy oqıǵa úshin ÝEFA «Astana» fýtbol klýbyna 5 myń eýro kóleminde aıyppul saldy. Elordanyń fýtbol klýby osy somany óndirip alý úshin Faızıevtiń ústinen talap-aryz berdi.
Іs materıaldaryn qaraǵan Astana qalasy Almaty aýdandyq soty Sh.Faızıevten «Astana» klýbyna 1 968 150 teńge óndirý jónindegi sheshim shyǵardy.
«Eger osyndaı oqıǵalar elorda klýbynyń eýropalyq klýbtyq týrnırlerinde jáne Qazaqstan birinshiliginiń oıyndarynda qaıtalansa ÝEFA nemese QFF «Astana» klýbyna atalǵan somadan kóp aıyppul salady.Sondyqtan elordalyq fýtbol klýby sot organdary arqyly buzaqylardan aıyppulǵa ketken shyǵyndaryn tolyq kólemde óndirip alýdy talap etedi», - delingen klýbtyń saıtynda.
