Fýtbol: «Aqjaıyqtyń» bas bapkeri qyzmetinen ketti
ORAL. QazAqparat – «Aqjaıyq» fýtbol klýbynyń bas bapkeri Artýr Avakıants qyzmetinen ketti, dep habarlaıdy QazAqparat tilshisi.
Oraldyq jattyqtyrýshynyń ornyn bosatqany jóninde «Aqjaıyq» fýtbol klýbynyń Instagram -daǵy paraqshasynda málim etildi.
A.Avakıants ótken jylǵy maýsymda da batysqazaqstandyqtardy jattyqtyryp, onda klýb birinshi lıgada úshinshi orynǵa ıe bolǵan edi.
Klýb basshylyǵy oǵan bıyl da senim artyp, «Aqjaıyqtyń» premer-lıgaǵa qaıta oralýyn basty mindet etip qoıǵan bolatyn. Alaıda oraldyqtardyń bul maqsat údesinen shyǵýy ekitalaı. Óıtkeni 13 qazan kúni ekinshi aınalymnyń alǵashqy matchynda №8 balalar men jasóspirimderdiń mamandandyrylǵan olımpıadalyq rezerv sport mektebi komandasynan 2:4 esebimen utylyp qaldy. Onyń aldynda kósh sońyndaǵy «Shahter-Bolat» komandasymen teń oınap, upaı joǵaltsa, sodan keıin negizgi qarsylasy «Atyraýǵa» 0:1 esebimen ese jiberdi.
Osylaısha qazir «Aqjaıyq» ekinshi konferentsııada besinshi orynǵa syrǵyp ketti. Birinshi lıgada eki konferentsııanyń árqaısysynda úzdik atanǵan qos komanda premer-lıgaǵa joldama alady.
Klýbtyń bas bapkeri mindetin ýaqytsha atqarý Alekseı Týgýshevke júkteldi.
Eske sala keteıik, budan buryn «Aqjaıyqtyń» el chempıonatyn jeńispen bastaǵanyn jazǵan bolatynbyz.
