Fýtbol: «Aqjaıyqqa» jańadan eki oıynshy alyndy

«Aqjaıyq» fýtbol klýbynyń baspasóz qyzmetinen túsken málimetke qaraǵanda, Sergeı Shaff pen Roman Pavınıchtiń ekeýi de - qazaqstandyq oıynshylar.

Shabýylshy 30 jastaǵy S.Shaff osyǵan deıin qaraǵandylyq «Shahterde» óner kórsetken. Bıylǵy jyldyń basynan beri - erkin agent. Fýtboldaǵy jolyn týǵan qalasy Qaraǵandyda bastaǵan ol «Atyraý», «Taraz», «Jetisý», «Altaı», «Oqjetpes» syndy klýbtarda dop tepken.

El birinshiliginde 276 oıyn ótkizip, 56 goldyń avtory atanǵan. Ásirese, 2016 jyly «Altaı» quramynda júrgende, qarsylastar qaqpasyna 14 dop soqqan.

Taǵy bir shabýylshy R.Pavınıch - almatylyq TsSKA komandasynyń túlegi. Keıin «Bolat» (Temirtaý), «Qaısar» (Qyzylorda), «Qyzyljar» (Petropavl) klýbtarynda oınaǵan. Ótken jyly «Maqtaaral» sapynda 29 matchta 10 goldyń avtory atandy. Jalpy, Qazaqstan chempıonatynda 198 oıyn (47 gol) ótkizgen.

Qazirgi kezde Túrkııada ekinshi oqý-jattyǵý jıynyn ótkizip jatqan, ýkraınalyq maman Sergeı Zaıtsev jattyqtyratyn oraldyq klýbtyń qaı komandalarmen kezdesetini belgili boldy. 22 aqpan kúni «Aqjaıyq» Armenııanyń tórt dúrkin chempıony «Shırakpen» alańǵa shyǵady. Sodan keıin 25-inde «Ertis» (Qazaqstan), 28-inde «Sloga Makedonııa» (Makedonııa), 2 naýryzda «Gomel» (Belarýs), 6 naýryzda «Dnepr» (Ýkraına) komandalarymen oınaıdy.

Eske sala keteıik, budan buryn «Aqjaıyq» jańa oıynshymen tolyǵyp, qos sheteldik fýtbolshy komandada qalǵan bolatyn.