Fýtbol: «Aqjaıyqqa» jańa oıynshylar alyndy
ORAL. QazAqparat - Túrkııada jańa maýsymǵa daıyndalyp jatqan «Aqjaıyqqa» tórt oıynshy alyndy, dep habarlaıdy QazAqparat tilshisi.
«Aqjaıyq» fýtbol klýbynyń baspasóz qyzmetinen túsken málimetke qaraǵanda, Dáýrenbek Tájimbetov, Ilnýr Mangýtkın, Arman Smaılov jáne Naýryzbek Jagorov komanda quramyn tolyqtyrdy.
Qyzylorda fýtbolynyń túlegi, shabýylshy D.Tájimbetovtiń esimi jankúıerlerge jaqsy tanys. 2004 jyly sporttyq jolyn «Qaısarda» bastaǵan ol bes jyl ishinde 142 matchta 19 gol soqty. 2010 jyly shymkenttik «Ordabasyǵa» aýysqan Dáýrenbek eki jylda 26 goldyń (82 kezdesý) avtory atandy. Sodan keıin de «Shahter», «Astana», «Ordabasy», «Taraz», «Atyraý», «Qaısar» sapynda dop tepti.
Qorǵaýshy I.Mangýtkın Oralǵa Qaraǵandydan keldi. «Shahter-ıÝnost», «Bolat-MSK» (Temirtaý), «Shahter» (Qaraǵandy), «Qazaqmys» (Sátbaev), «Tobyl» (Qostanaı), «Oqjetpes» (Kókshetaý) komandalarynda oınaǵan.
Pavlodarlyq «Ertistiń» túlegi A.Smaılov - bolashaǵynan úlken úmit kúttiretin jas shabýylshylardyń biri. 2017 jyldan beri «Ertistiń» negizgi quramynda da óner kórsetti. 18, 19 jáne 21 jasqa deıingi Qazaqstan jastar quramasyna da shaqyrtý alǵan.
Atyraý fýtbol mektebiniń daryndy ókilderiniń biri N.Jagorov ótken maýsymdy Kókshetaýdyń «Oqjetpesi» sapynda ótkizdi. 28 oıynda bir gol soǵyp, tórt márte nátıjeli pas berdi.
Eske sala keteıik, budan buryn «Aqjaıyqqa» jańadan eki oıynshy alynǵanyn, komandanyń «Ertisti» utyp, makedonııalyq klýbpen teń oınaǵanyn jazǵan bolatynbyz.
Oralda daryndy jastardyń ósip kele jatqany da belgili boldy.
