Fýtbol: «Aqjaıyqqa» jańa bapker keldi
ORAL. QazAqparat - Ýkraınalyq maman Sergeı Zaıtsev «Aqjaıyq» komandasynyń bas bapkeri bolyp iske kiristi, dep habarlaıdy QazAqparat tilshisi.
«Aqjaıyq» fýtbol klýbynyń baspasóz qyzmetinen túsken málimetke qaraǵanda, 45 jasar S.Zaıtsev buǵan deıin «Karpaty» (Lvov) komandasyn jattyqtyrǵan.
Sergeı Larıonovıch 1973 jyly 13 sáýirde Zaporojede dúnıege kelgen. «Metallýrg» fýtbol klýbynyń olımpıadalyq rezevtegi balalar-jasóspirimder sport mektebinde tárbıelengen ol Zaporojeniń «Torpedo» klýbynda oıynshy retindegi jolyn bastady.
«Metallýrg», «Metallıst» (ekeýi de Ýkraına), «Neftehımık» (Reseı), «Legııa», «Pogon» (ekeýi de Polsha), «Tatran», «Koshıtse», «Dýkla» (úsheýi de Slovakııa) komandalarynda oınaǵan S.Zaıtsevke Qazaqstan birinshiligi de jat emes. Ol «Qaısar» men «Atyraý» sapynda dop teýip kórdi.
Jattyqtyrýshylyq jolyn 2009 jyly bastaǵan maman «Atyraý», «Metallýrg» (Zaporoje) komandalary bas bapkerleriniń kómekshisi boldy. 2011-2013 jyldary «Metallýrgtiń» bas bapkerligin qolǵa alyp, 2012 jyly komandasyn Ýkraınanyń premer-lıgasyna shyǵardy. Sosyn Moldovanyń «Zarıa» klýbyn jattyqtyrdy. 2016 jyldan beri «Karpaty» klýby quramynda jumys jasap, «Aqjaıyqqa» kelgenge deıin bas bapkeri boldy.
Eske sala keteıik, Oraldyń «Aqjaıyǵyn» buǵan deıin de ýkraınalyq maman Vladımır Mazıar jattyqtyrǵan bolatyn. Ol 13 mamyr kúni oraldyqtar Aqtóbede 3:5 esebimen jeńilis tapqannan keıin komandamen qosh aıtysqan edi.
Bir qyzyǵy, S.Zaıtsev «Aqtóbemen» ótetin oıyn qarsańynda komanda tizginin ustap otyr. Týrnır kestesinde altynshy orynda kele jatqan «Aqjaıyq» el birinshiliginiń HH týrynda 28 shilde kúni P.Atoıan atyndaǵy stadıonda aqtóbelikterdi qabyldaıdy. Besinshi orynda turǵan aqtóbelikter men oraldyqtardyń upaıy birdeı. Sondyqtan aldaǵy kezdesýdiń tartysty óteri anyq.
