Fýtbol: «Aqjaıyqqa» úsh qazaqstandyq oıynshy alyndy
ORAL. QazAqparat - Túrkııada qorytyndy oqý-jattyǵý jıynyn ótkizip jatqan «Aqjaıyqqa» úsh qazaqstandyq oıynshy alyndy, dep habarlaıdy «QazAqparat» tilshisi.
«Aqjaıyq» klýbynyń baspasóz qyzmetinen túsken málimetke qaraǵanda, Oral fýtbolynyń qos birdeı túlegi, basqa komandalarda biraz tájirıbe jınaqtaǵan Vladımır Pokatılov pen jas jartylaı qorǵaýshy Ádilet Bolatovpen eńbek shartyna qol qoıyldy. Sondaı-aq komanda 23 jasar Shyńǵys Saparbekulymen tolyqty.
Aıta keteıik, ýkraınalyq maman Vladımır Mazıar jattyqtyratyn oraldyqtar Túrkııadaǵy sońǵy joldastyq kezdesýin 28 aqpan kúni reseılik «Tom» klýbymen ótkizedi. Sodan keıin elge oralady. Munyń aldynda «Aqjaıyq» ýkraınalyq «Obolon» klýbyn 1:0 esebimen utty. 75-mınýtta ýkraınalyq Aderınsola Eseolanyń pasynan keıin onyń otandasy Igor Hýdobıak mergendik tanytty. Bıyl batysqazaqstandyq komandaǵa Ýkraınadan jeti birdeı oıynshy alyndy.
