Fýtbol: «Aqjaıyqqa» senegaldyq shabýylshy alyndy
ORAL. QazAqparat - Fýtboldan premer-lıga komandalary arasynda el birinshiliginde oınaıtyn «Aqjaıyqqa» senegaldyq shabýylshy Malık Mane alyndy, dep habarlaıdy QazAqparat tilshisi.
«Aqjaıyq» fýtbol klýbynyń dırektory Nurtaza Ábilhanovtyń aıtýynsha, M.Manemen bir jylǵa kelisimshartqa qol qoıyldy. Ol alańǵa jetinshi nómirmen shyǵatyn bolady.
Bıyl otyzǵa tolatyn Malık Mane qazaqstandyq jankúıerlerge jaqsy tanys. Ol 2011 jyly «Aqtóbeniń» namysyn qorǵasa, 2016 jyly «Tarazǵa» keldi. Sol jyly «Tarazdyń» quramynda 13 gol soqty. Ótken jylǵy maýsymdy qytaılyq «Neı Mengý Chjýnıý» klýbynda bastaǵanymen, jazda Tarazǵa qaıta keldi. Bul joly 13 match ótkizip, úsh goldyń avtory atanyp, eki márte nátıjeli pas berdi.
Aıta keteıik, el chempıonatynyń úshinshi týrynda Pavlodardyń «Ertisin» utqan «Aqjaıyq» týrnır kestesinde 4 upaımen segizinshi orynda keledi. Oraldyqtar kelesi kezdesýin 7 sáýir kúni Almatyda «Qaıratpen» ótkizedi.
