Fýtbol: «Aqjaıyqqa» Latvııa ulttyq quramasynyń oıynshysy alyndy
ORAL. QazAqparat - Oraldyń «Aqjaıyǵyna» jańadan Latvııa ulttyq quramasynyń oıynshysy alyndy, dep habarlaıdy QazAqparat tilshisi.
«Aqjaıyq» fýtbol klýbynyń baspasóz qyzmetinen túsken málimetke qaraǵanda, Artýr Karashaýskas sporttyq jolyn «ıÝFTs Skonto» jastar klýbynda bastaǵan.
Shabýylshy 2009 jyly «Olımp» fýtbol klýbymen kelisimshartqa otyryp, alǵashqy maýsymda-aq 18 matchta 10 gol soqty. Karashaýskas óz komandasynyń Latvııa joǵary lıgasynda besinshi oryn alýyna úles qosyp, chempıonattyń úzdik jas oıynshysy atandy.
2010 jyly Artýr Rıganyń «Skonto» klýbyna alynyp, 4 matchta qarsylastar qaqpasyna 7 gol engizdi. 2011 jyly 15 oıynda qos goldyń avtory atandy. 2012 jyly «Gýlbene» klýbyna aýysqanymen, bir jyldan keıin «Skontoǵa» qaıtyp oraldy. Sonyń quramynda Eýropa lıgasy oıynynda óziniń birinshi golyn soǵyp, komandasynyń chehııalyq «Slovandy» 2:1 esebimen utýyna kómektesti.
Qazannyń «Rýbın» komandasynda da dop teýip kórgen Karashaýskas 2015-2016 jylǵy maýsymda «Skonto» quramynda 21 kezdesýde 10 goldy óz esebine jazdy.
Polshanyń «Pıast», Shveıtsarııanyń «Vıl» komandalarynda oınap kórgen latvııalyq shabýylshy ótken jyly «Lıepaıa» quramynda 27 oıynda 15 ret mergendik tanytty. Bıyl 15 matchta 5 gol soqty.
Artýr Karashaýskas Latvııa quramasynyń sapynda 13 oıyn ótkizdi.
Eske sala keteıik, budan buryn «Aqjaıyqqa» ıvýarlyq shabýylshy Idrıssa Kýıateniń kelgenin jazǵan bolatynbyz. Ol qazir komandada synnan ótýde.
