Fýtbol: «Aqjaıyqqa» brazılııalyq oıynshy qosyldy
ORAL. QazAqparat - Túrkııada ekinshi oqý-jattyǵý jıynyn ótkizip jatqan «Aqjaıyq» brazılııalyq Mello Korbellınımen kelisimshartqa qol qoıdy, dep habarlaıdy QazAqparat tilshisi.
«Aqjaıyq» fýtbol klýbynyń baspasóz qyzmetinen túsken málimetke qaraǵanda, Brazılııanyń Porto Alegre qalasynda 1992 jyly dúnıege kelgen M.Korbellını - qazirgi kezde Italııa eliniń azamaty.
Ataqty «Botafogo» fýtbol klýbynyń mektebinen ótken oıynshy óziniń týǵan komandasynyń negizgi quramyna ilige almady. 2012 jyly muhıt asyp, Portýgalııaǵa kelgen ol jergilikti «Os Lımıanos» klýbynyń sapynda 9 oıyn ótkizip, eki gol soqty. Keıin Polsha chempıonatynda óner kórsetetin «Rýh» klýbyna aýysty. Munda 27 matchta 4 goldyń avtory atandy. «Aqjaıyqqa» kelgenge deıin Polshanyń joǵary dıvızıonynda oınaıtyn «Zaglembe» fýtbol klýbynyń namysyn qorǵady.
Búgin Sergeı Zaıtsevtiń shákirtteri oqý-jattyǵý jıynyndaǵy sońǵy joldastyq kezdesýin «Dnepr» (Ýkraına) komandasymen ótkizedi.
Eske sala keteıik, budan buryn «Aqjaıyqqa» jańa oıynshylar alynǵanyn jazǵan bolatynbyz.
