Fýtbol: «Aqjaıyq» jergilikti oıynshylarǵa taǵy da bir múmkindik berip otyr
ORAL. QazAqparat - Fýtboldan premer-lıgada óner kórsetetin Oraldyń «Aqjaıyǵy» jergilikti oıynshylarǵa taǵy da bir múmkindik berip otyr, dep habarlaıdy «QazAqparat» tilshisi.
«Aqjaıyq» fýtbol klýbynyń dırektory Nurtaza Ábilhanovtyń aıtýynsha, komanda 8-28 qańtar aralyǵynda Túrkııada oqý-jattyǵý jıynyn ótkizedi.
Batysqazaqstandyq klýbqa ýkraınalyq maman Vladımır Mazıardyń bas bapker bolyp kelgeni belgili. Ol Qazaqstanda eshkimdi bilmeıdi, oıynshylarǵa tyń kózben qaraıtyny belgili. Sondyqtan buryn «Aqjaıyqta» oınap, basqa jaqqa ketken Nıkolaı Zabrodın, Rýslan Qaıyrov, Sergeı Shevtsov baqtaryn taǵy bir márte synap kórmek. Sol sekildi Almatynyń «Qaıratynda» fýtboldaǵy jolyn bastaǵan tájirıbeli Rýslan Saqalbaev, Bolgarııanyń «Vereıa» klýbynda dop teýip úlgergen taǵy bir jartylaı qorǵaýshy Erkebulan Nurǵalıev atalmysh jıynǵa qatysady.
Jańa maýsym aldynda bireýlerdiń ketip, ekinshileriniń qalýy zańdy nárse. Mysaly, komanda kapıtany Meıram Sapanov, jartylaı qorǵaýshy Azat Ersálimov, legıonerlerden horvatııalyq Denıs Glavına qalyp otyr.
«Oqý-jattyǵý jıyndary barysynda ózderin jaqsy qyrynan kórsetkender komandaǵa alynady. Legıonerlerdiń de qosylatyny anyq. Olarmen kelisimshartqa qol qoıylǵannan keıin ǵana naqty aıtýǵa bolady», dedi «QazAqparat» tilshisine Nurtaza Serikuly.
