Fýtbol: «Aqjaıyq» úsh oıynshymen kelisimshartty uzartty

«Aqjaıyq» fýtbol klýbynyń baspasóz qyzmetinen túsken málimetke qaraǵanda, Baýyrjan Omarov, Vladımır Pokatılov jáne Rýslan Qaıyrov jańa maýsymdy komanda quramynda ótkizedi.

Olardyń úsheýi de - Oral fýtbolynyń túlekteri.

Fýtboldaǵy jolyn 2006 jyly jergilikti jastar komandasynda bastaǵan Baýyrjan Omarov «Aqjaıyqqa» 2010 jyly shaqyrtylyp, premer-lıgadaǵy alǵashqy oıynyn ótkizdi. Qorǵaýshy bolǵanymen, kezinde el chempıony bolǵan qaraǵandylyq «Shahterdiń» qaqpasyna gol soqqan B.Omarov «Aqjaıyq» úshin júzden astam match ótkizip, komanda kóshbasshylarynyń birine aınalyp úlgerdi.

Vladımır Pokatılov 2010 jyly klýbtyń qosalqy quramynda oınady. Úsh jyldan soń negizgi quramǵa ilikken ol «Aqjaıyqtan» bólek «Tobyl», «Jetisý», «Bolat-AMT», «Maqtaaral» klýbtarynda dop tepti. Bir qyzyǵy, Vladımırdiń syńary Stas Pokatılov - Qazaqstan ulttyq quramasy men «Qaırat» komandasynyń qaqpashysy.

Rýslan Qaıyrov ta 2006 jyly jastar komandasynda baǵyn synap, eki jyldan keıin «Aqjaıyqqa» alyndy. Premer-lıgada oınaǵan ol «Qyzyljar», «Altaı» komandalarynda da óner kórsetip keldi.

Eske sala keteıik, budan buryn jańa maýsymǵa daıyndalyp jatqan «Aqjaıyqtyń» reseılik klýbpen teń oınaǵanyn jazǵan bolatynbyz.

Búgin ýkraınalyq maman Sergeı Zaıtsev jattyqtyratyn oraldyqtar Grýzııanyń «Dıla» klýbymen (buryn josparlanǵan ózbekstandyq «Andıjanmen» match ótpeıtin boldy) jasyl alańǵa shyǵady. Gorı qalasynyń namysyn qorǵaıtyn «Dıla» 1949 jyly qurylǵan. Grýzııa chempıonattaryna toqsanynshy jyldardan beri qatysyp keledi. 2011-2012 jylǵy maýsymda el kýbogyn ıelense, 2015 jyly Grýzııa chempıony atandy.

Bul oıyn «Aqjaıyqtyń» Túrkııadaǵy alǵashqy oqý-jattyǵý jıynyndaǵy sońǵy kezdesýi bolmaq.