Fýtbol: «Aqjaıyq» «Tarazben» teń oınady
ORAL. QazAqparat - Fýtboldan Premer-lıga komandalary arasynda el birinshiliginiń kezekti týrynda Oraldyń «Aqjaıyǵy» P.Atoıan atyndaǵy stadıonda «Tarazdy» qabyldady, dep habarlaıdy «QazAqparat» tilshisi.
Birinshi taım alań ıeleriniń basymdylyǵymen ótti. 26-mınýtta nıgerııalyq legıoner Izý Azýka qonaqtardyń qaqpasyn baspen dál kózdedi.
Oıynnyń ekinshi kezeńinde tarazdyqtar shabýyldaryn jaqsy uıymdastyryp, sheberlikterin tanytty. 54-mınýtta Baktıer Zaınýtdınov baspen Vıacheslav Kotlıardy qapy qaldyrsa, 64-mınýtta Maksım Feşýk aıyp dobyn tamasha oryndady. Budan keıin oraldyqtar alǵa umtylyp baqty. Ásirese, paragvaılyq Freddı Koroneldiń ornyna tyńnan qosylǵan kolýmbııalyq legıoner Arenas Delgado aldyńǵy shepke jan kirgizdi. Onyń qaýipti soqqysyn «Tarazdyń» qaqpashysy Djýrahon Babahanov qaıtara bildi. Oıyn sońyna taman tarazdyqtar óz aıyp alańynda tártip buzyp, tóreshi 11 metrlik penaltıdi belgiledi. Ony Izý Azýka múlt jibergen joq. Sóıtip tartysty oıyn 2:2 esebimen teń aıaqtaldy. «Taraz» 17 upaımen jetinshi orynda qalsa, «Aqjaıyq» 14 upaımen 11-orynǵa syrǵydy.
Aıta keteıik, keshe Almatynyń «Qaıraty» Shymkentte «Ordabasyny» 2:0 esebimen utyp, 40 upaımen kósh basyna kóterilgen edi. Alaıda búgin «Astana» komandasy Kókshetaýdyń «Oqjetpesin» 3:0 esebimen oısyrata jeńip, 42 upaımen qaıtadan birinshi orynǵa shyqty. Al Pavlodarda «Qaısardy» 1:0 esebimen tize búktirgen «Ertis» 31 upaı jınap, úshinshi oryndaǵy «Ordabasyǵa» (35 upaı) jaqyndaı tústi. «Atyraý» óz alańynda «Aqtóbeden» 2:0 esebimen basym tússe, Qaraǵandynyń «Shahteri» syrt alańda Qostanaıdyń «Tobylyn» 2:1 esebimen utyp ketti.
