Fýtbol: «Aqjaıyq» taǵy bir reseılik klýbty utty
ORAL. QazAqparat - Túrkııada oqý-jattyǵý jıynyn ótkizip jatqan Oraldyń «Aqjaıyǵy» «Kýban» (Krasnodar) komandasymen joldastyq kezdesý ótkizdi, dep habarlaıdy «QazAqparat» tilshisi.
«Aqjaıyq» fýtbol klýbynyń baspasóz qyzmetinen túsken málimetke qaraǵanda, Reseıdiń FNL (Fýtbol ulttyq lıgasy) chempıonatynda óner kórsetetin «Kýbanmen» Belek qalasynda ótken oıynda oraldyqtar jeńisti julyp áketti. 89-mınýtta «Aqjaıyqta» synnan ótip júrgen Igor Výzıchıch mergendik tanytty.
Aıta keteıik, budan buryn ýkraınalyq maman Vladımır Mazıar jattyqtyratyn batysqazaqstandyqtar Reseıdiń premer-lıgasynda oınaıtyn «Amkar» (Perm) klýbyn da 1:0 esebimen tize búktirgen bolatyn. 26 qańtar kúni «Aqjaıyq» taǵy bir joldastyq kezdesýin Rýmynııanyń birinshi lıgasynda oınaıtyn «Volýntarı» klýbymen ótkizedi.
