Fýtbol: «Aqjaıyq» syrt alańda «Tarazdy» utty
ASTANA. QazAqparat - Búgin fýtboldan premer-lıga komandalary arasynda el chempıonaty HHІІІ týrynyń oıyndary márege jetti, dep habarlaıdy «QazAqparat» tilshisi.
Osyǵan deıin kósh sońynda kele jatqan Oraldyń «Aqjaıyǵy» Tarazda jergilikti komandamen alańǵa shyqty. Batysqazaqstandyqtarǵa úsh upaı aýadaı qajet bolǵandyqtan, olar kezdesý barysynda barynsha alǵa umtylyp baqty. Sondaı sátterdiń birinde ýkraınalyq shabýylshy Konstantın Dýdchenko qaqpashymen jekedara shyqqanymen, Jýrahon Babahanovtan aılasyn asyra almady. Budan keıin oıyn alań ıeleriniń basymdylyǵymen órbip, olar da birneshe múmkindikti múlt jiberdi. Ekinshi taımda kerisinshe «Aqjaıyq» kezdesý tizginin qolyna aldy. Aqyry 72-mınýtta Dmıtrıı Shmıdt qaqpa buryshyn dál kózdedi. Osydan soń «Taraz» tarazy basyn teńestirýge tyrysty. Degenmen Vahıd Masýdovtyń shákirtteri sátti qorǵana bildi. Sonyń ishinde qaqpashy Vıacheslav Kotlıar da seıv jasap, tarazdyqtardyń gol soǵýyna múmkindik bergen joq.
Osylaısha, birinshiliktiń úshinshi aınalymyn tabysty bastaǵan «Aqjaıyq» bıylǵy maýsymdaǵy syrt alańdaǵy alǵashqy jeńisine qol jetkizdi. Bul týrdan keıin 19 upaı jınaǵan batysqazaqstandyqtar «Aqtóbeni» artqa tastap, 11-inshi orynǵa kóterildi. Oraldyqtar kelesi kezdesýin dál osy aqtóbeliktermen 19 tamyz kúni óz alańynda ótkizedi.
Aıta keteıik, Aqtóbede jergilikti komandany 3:0 esebimen oısyrata utqan «Astana» 57 upaımen burynǵysha birinshi orynda keledi. Kókshetaýdyń «Oqjetpesin» 1:0 esebimen súrindirgen almatylyq «Qaırattyń» astanalyqtardan jeti upaıy kem. Al úshinshi oryndaǵy Shymkenttiń «Ordabasy» komandasy Qaraǵandyda «Shahterge» 1:2 esebimen ese jiberdi. Qyzylordada «Qaısar» Qostanaıdyń «Tobylyn» 1:0 esebimen tize búktirse, Atyraýda jergilikti komanda men Pavlodardyń «Ertisi» (0:0) teń tarqasty.
