Fýtbol: «Aqjaıyq» syrt alańda «Atyraýdy» utty
NUR-SULTAN. QazAqparat – Fýtboldan Qazaqstan chempıonatynyń besinshi týry Atyraýda jergilikti komanda men «Aqjaıyqtyń» oıynymen bastaldy, dep habarlaıdy QazAqparat tilshisi.
Qorjynynda 7 upaıy bar, qazaqstandyq maman Konstantın Gorovenko jattyqtyratyn atyraýlyqtar týrnır kestesinde besinshi orynda tursa, oraldyqtar (bas bapkeri – ýkraınalyq Vladımır Mazıar) nebári bir upaımen 12-satyda edi.
Osyǵan deıin qos komanda ózara 24 match ótkizse, sonyń 11-inde «Atyraý», 9-ynda «Aqjaıyq» jeńiske jetip, 4 báseke teń aıaqtalǵan.
Bul joly batys derbıinde birinshi taımda alań ıeleri reseılik Stepan Sıkach qorǵaǵan qonaqtar qaqpasyna jıi qaýip tóndirdi. Degenmen 37-mınýtta qarymta shabýyldan keıin oraldyq Ivan Antıpovtan pas alǵan kezinde Qazaqstan ulttyq quramasynda dop tepken shabýylshy Oralhan Ómirtaev esep ashty. Bul Oralhannyń «Aqjaıyq» sapyndaǵy alǵashqy goly edi. Onyń ústine oraldyqtar buǵan deıingi úsh oıynda gol soqpaǵan edi.
Ekinshi taımda komandalar fýtbolshylar almastyryp, oıyn barysyn ózgertýge tyrysqanymen, esep saqtaldy. 1:0 – «Aqjaıyqtyń» paıdasynda.
Osylaısha oraldyqtar bıylǵy maýsymdaǵy birinshi jeńisine qol jetkizip, týrnır kestesinde 11-orynǵa kóterildi.
Kelesi týrda 15 sáýir kúni «Atyraý» Aqtaýǵa, «Kaspııge» qonaqqa barsa, «Aqjaıyq» óz alańynda «Astanany» qabyldaıdy.
Eske sala keteıik, budan buryn «Aqjaıyq» pen «Qaırattyń» teń tarqasqanyn jazǵan bolatynbyz.
Sýretterdi túsirgen Aıbatyr NURASh
