Fýtbol: «Aqjaıyq» Serbııanyń sýperlıgasynda oınaıtyn «Spartakty» utty
ORAL. QazAqparat - Túrkııada Oraldyń «Aqjaıyǵy» Serbııanyń sýperlıgasynda oınaıtyn «Spartak» (Sýbotıtsa) komandasymen joldastyq kezdesý ótkizdi, dep habarlaıdy QazAqparat tilshisi.
«Aqjaıyq» fýtbol klýbynan túsken málimetke qaraǵanda, oqý-jattyǵý jıynynda oraldyq komanda bes oıyn josparlasa, bul sonyń alǵashqysy edi.
Matchty «Aqjaıyq» qarqyndy bastap, aldymen gol soqty. Sodan keıin ǵana jınaqy oınaǵan «Spartak» esepti teńestire aldy. Keıin emotsııaǵa erik bergen «Aqjaıyq» fýtbolshysy alańnan qýylyp, on oıynshymen qalsa da, oraldyqtar 2:1 esebimen alǵa shyqty. Ekinshi taımda qorǵanysty nyq ustap, óz múmkindigin sheber paıdalanǵan batysqazaqstandyq klýb jeńiske jetti - 3:1.
Úsh goldy da qaralymǵa kelgen fýtbolshylar engizdi.
«Aqjaıyq» fýtbol klýbynyń dırektory Azamat Shaıhynyń aıtýynsha, komanda quramy qazir jasaqtalý ústinde.
«Biz komandany ótken jazdan beri jattyqtyryp kele jatqan ýkraınalyq maman Sergeı Zaıtsevke jańa maýsymda da senim artýdy uıǵardyq. Birinshi lıgada eki klýbty ǵana sheteldik maman baptasa, sonyń biri bizde. Eń bastysy, bapker bilikti bolyp, alǵa qoıǵan maqsat - premer-lıgaǵa qaıta oralý mindetin oryndaı bilýi kerek», dedi QazAqparat tilshisine A.Shaıhy.
Eske sala keteıik, budan buryn «Aqjaıyq» bapkeriniń shaǵyn suhbatyn jarııalaǵan bolatynbyz.
