Fýtbol: «Aqjaıyq» reseılik klýbpen teń oınady
ORAL. QazAqparat - Túrkııada jańa maýsymǵa daıyndalyp jatqan Oraldyń «Aqjaıyǵy» Reseıdiń «Ýrojaı» klýbymen (Krasnodar) joldastyq kezdesý ótkizdi, dep habarlaıdy QazAqparat tilshisi.
Tartysty ótken match 1:1 esebimen teń aıaqtaldy.
«Aqjaıyqtyń» bas bapkeri, ýkraınalyq maman Sergeı Zaıtsevtiń aıtýynsha, Túrkııada oqý-jattyǵý jıyny bastalǵannan beri 15 kún ótken. Sodan beri oıynshylar barynsha ter tógip, eńbektenýde.
«El birinshiligindegi alǵashqy oıynǵa deıin áli aı jarymdaı ýaqyt bar. Bul jıynda selektsııalyq jumysqa mán berildi. Endi ekinshi oqý-jattyǵý jıynynda jumys aýqymyn kóbeıtip, kúshti komandalarmen kezdesetin bolamyz. Búgingi oıynda «Aqjaıyq» qaısarlyǵyn tanytyp, esepti teńestire bildi», dedi S.Zaıtsev.
Oraldyq klýb sapyndaǵy tájirıbeli fýtbolshylardyń biri Rýslan Qaıyrovtyń sózine qaraǵanda, komandada jastar az emes.
«Birinshi taımda gol jiberip alǵanmen, ekinshi kezeńde qarymta qaıyrdyq. Bapkerdiń tapsyrmasyn oryndadyq. «Aqjaıyqta» jastar az emes. Birinshi lıgada komanda quramynda keminde eki jas fýtbolshy oınaýy tıis. Sondyqtan biz olarǵa aqyl-keńesimizdi aıtyp, sheberlikterin jetildirýine kómektesýdemiz», dedi R.Qaıyrov.
Eske sala keteıik, budan buryn «Aqjaıyqtyń» Túrkııada jattyǵyp jatqanyn jazǵan bolatynbyz.
11 aqpan kúni oraldyqtar «Andıjan» (Ózbekstan) komandasymen joldastyq kezdesý ótkizedi.
