Fýtbol: «Aqjaıyq» premer-lıgadaǵy ornyn saqtap qaldy

Fýtboldan premer-lıga komandalary arasyndaǵy el birinshiliginde oraldyqtar (bas bapkeri Vahıd Masýdov) bıyl onynshy, al Qýanysh Qaraqulov jattyqtyratyn Maqtaaral aýdanynyń komandasy birinshi lıgada tórtinshi orynǵa ıe bolǵan edi. Birinshi lıgada úshinshi orynǵa taban tiregen «Qaırat A» komandasy «Qaırattyń» farm-klýby bolǵandyqtan, joǵary top joldamasy úshin talasýǵa quqyǵy joq-ty, sondyqtan bul múmkindikti ońtústikqazaqstandyqtarǵa berdi.

Batysqazaqstandyqtar oıyn tizginin birden qolǵa alyp, Almas Qamytbekov qorǵaǵan qaqpany jıi nysanaǵa aldy. Tipti gol soǵyp ta úlgerdi. Áıtse de dop Predrag Govedarıtsanyń qolyna tıip ketkendikten, gol eseptelmedi. Esesine 35-mınýtta ońtústikqazaqstandyqtar kútpegen jerden esep ashty. Standartty jaǵdaıdan Elmar Nabıevtiń toǵyzdyqqa tepken dobyn «Aqjaıyqtyń» qaqpashysy Vıacheslav Kotlıar qaıtaryp úlgergenimen, oǵan birinshi bolyp Samıt Chýlagov jetti.

Sóıtip bıylǵy maýsymdy «Aqjaıyqta» bastap, «Maqtaaralǵa» aýysqan S.Chýlagov óziniń burynǵy komandasyna gol soqty. Birinshi taım osylaısha 0:1 esebimen aıaqtalatyndaı kóringen. Degenmen qosymsha mınýtta Azat Ersálimovtiń sol qaptaldan bergen dobyn «Aqjaıyqtyń» shabýylshysy, ýkraınalyq legıoner Konstantın Dýdchenko tordan bir-aq shyǵardy. Aıta keteıik, bul matchta «Aqjaıyq» birinshi lıganyń shartyna sáıkes alańda úsh-aq legıonermen oınaýǵa májbúr boldy.

Ekinshi taımda V.Masýdov shákirtteriniń alǵa shyǵatyndaı keremet múmkindikteri boldy. Ásirese, 75-mınýtta S.Chýlagov óz aıyp alańynda nıgerııalyq qorǵaýshy Maıkl Odıbeni shalyp jyqty. Alaıda 11 metrlik aıyp dobyn K.Dýdchenko dál oryndamaı, ony A.Qamytbekov qaqshyp ala bildi. Degenmen match aıaqtalýǵa tórt mınýt qalǵanda, taǵy da A.Ersálimovtiń pasynan keıin K.Dýdchenko baspen qaqpany dál  kózdep, qos goldyń avtory atandy. Budan keıin «Maqtaaral» qansha tyrysqanymen, esep ózgergen joq.

Osylaısha, 2:1 esebimen jeńiske jetken «Aqjaıyq» premer-lıgadaǵy ornyn saqtap qaldy.