Fýtbol: «Aqjaıyq» pen «Shahter» komandalary teń oınady
ORAL. QazAqparat - Búgin el birinshiliginiń jetinshi týrynda Oraldyń "Aqjaıyǵy" óz alańynda Qaraǵandynyń "Shahterin" qabyldady, dep habarlaıdy QazAqparat tilshisi.
Aqsaı qalasyndaǵy "Qarashyǵanaq" stadıonynda aldymen alań ıeleri esep ashty. 26-mınýtta Berik Shaıhov qaqpa buryshyn dál kózdedi. Sóıtip ol "Aqjaıyq" sapyndaǵy alǵashqy golyn soqty. Qonaqtar tarazy basyn teńestirýge tyrysyp baqty.
Ekinshi taımda "Shahterden" Aleksandr Volodko mergendigimen kózge tústi.
Búgin Batys Qazaqstanda soqqan kúshti jel oıynshylarǵa da kedergi keltirdi.
Osylaısha qos komanda 1:1 esebimen teń tarqasty.
Týrnır kestesinde "Shahter" men "Aqjaıyq" sáıkesinshe 10 jáne 9 upaımen besinshi, altynshy orynda keledi.
Eske sala keteıik, batysqazaqstandyqtar ótken týrda Qostanaıdyń "Tobylymen" 1:1 esebimen teń oınaǵan bolatyn. Oraldyqtar kelesi kezdesýin 5 mamyr kúni Petropavlda jergilikti "Qyzyljarmen" ótkizedi.
