Fýtbol: «Aqjaıyq» pen «Qyzyljar» komandalary teń tarqasty
ORAL. QazAqparat - Fýtboldan el chempıonatynyń HHІH týrynda Oraldyń «Aqjaıyǵy» óz alańynda Petropavldyń «Qyzyljaryn» qabyldady, dep habarlaıdy QazAqparat tilshisi.
Bul oıyn, ásirese, osynyń aldynda qatarynan úsh márte utylǵan oraldyqtar úshin asa mańyzdy edi. Olarǵa jeńis aýadaı qajet bolatyn.
Ótken týrda eskertý alýlaryna baılanysty «Aqjaıyqtan» horvatııalyq Denıs Glavına, «Qyzyljardan» qaqpashy Anton Tsırın men gambııalyq shabýylshy Momodý Sıseı bul matchqa qatysa alǵan joq.
Birinshi taım basynda qonaqtar belsendirek qımyldap, jıirek alǵa umtyldy. Alań ıeleri taım ortasyna qaraı «tirildi» deýge bolady.
Esesine ekinshi taım «Aqjaıyqtyń» tolyqtaı basymdylyǵymen ótti. Degenmen «Qyzyljardyń» qarymta shabýyly kezinde ýkraınalyq qaqpashy Evgenıı Borovık eki márte qaýipti soqqyny qaıtara bildi.
«Aqjaıyqtyń» bas bapkeri Sergeı Zaıtsev Erkebulan Nurǵalıevtiń ornyna Ivan Antıpovty shyǵarǵanymen, ol komandalastarymen túsinisip, oınaı almady. Senegaldyq shabýylshy Malık Maneni Latvııa ulttyq quramasynyń múshesi Artýr Karashaýsks almastyrdy. Bálkim, shabýyl shebindegi osy qos fýtbolshy birden shyqqanda, oıyn nátıjelirek bolar ma edi. Alań ıelerinen ýkraınalyq legıonerler Andreı Tkachýk pen Igor Hýdobıakty atap ótýge bolady. Oraldyqtar únemi oń ne sol qanattan shabýyl uıymdastyrmaq bolǵanymen, odan eshteńe ónbedi. Orta tustan jaryp ótetin eshkim joq, boılary alasa bolǵannan keıin dopty qabyldaı almaı jatty.
Qosymsha bes mınýt qosylǵannan keıin Berik Shaıhovtyń alystan toǵyzdyqty kózdep, tepken dobyn «Qyzyljardyń» qaqpashysy Tımýrbek Zákirov qaıtaryp, óz komandasyn goldan aman alyp qaldy.
Osylaısha qos komanda 0:0 esebimen teń tarqasyp, bir ǵana upaıǵa ıe boldy.
Bul týrda Pavlodardyń «Ertisi» Qostanaıda «Ertisti» 2:1 esebimen utyp ketti. «Ordabasy» óz alańynda «Qaıratty» 2:0 esebimen tize búktirdi. «Jetisý» - «Shahter» (1:1), «Qaısar» - «Atyraý» (2:2) komandalary teń oınady.
Erteń aqtóbelikter óz alańynda «Astanany» qabyldaıdy. Almatylyqtardyń búgingi jeńilisinen keıin elordalyqtarǵa upaı aıyrmasyn odan saıyn ulǵaıtýǵa múmkindik týyp otyr.
Kerisinshe kósh sońyndaǵy komandalardyń arasyndaǵy taıtalas qyza tústi. Qazirgi kezde «Qyzyljar» 31 upaımen segizinshi orynda qalsa, odan keıin «Aqjaıyq» (30 upaı) toǵyzynshy, «Ertis» (29 upaı) onynshy, «Atyraý» (29 upaı) 11-inshi, «Shahter» (28 upaı) 12-inshi satyda keledi.
20, 21 qazanda ótetin HHH týrda «Astana» - «Ordabasy», «Ertis» - «Qaısar», «Atyraý» - «Aqjaıyq», «Shahter» - «Aqtóbe», «Qaırat» - «Tobyl», «Qyzyljar» - «Jetisý» komandalary ózara kezdesedi.
