Fýtbol: «Aqjaıyq» pen «Qaısar» teń oınady
ORAL. QazAqparat - Fýtboldan el chempıonatynyń HHІІ týrynda Oraldyń «Aqjaıyǵy» P.Atoıan atyndaǵy stadıonda Qyzylordanyń «Qaısaryn» qabyldady, dep habarlaıdy QazAqparat tilshisi.
Batysqazaqstandyq klýbtyń bas bapkeriniń mindetin atqarýshy Artýr Avakıants sársenbi kúni «Astanamen» ótken oıyndaǵy quramǵa ózgeris engize qoıǵan joq. Degenmen bul joly alań ıelerine jelpinis jetispedi.
Match barysynda qonaqtar kóbirek shabýyldap, «Aqjaıyqtyń» qaqpasyna jıirek qaýip tóndirdi. Sondaı sátterdiń birinde qaqpashy Sergeı Tkachýk seıv jasaı bildi. Jalpy, osymen úshinshi oıyn qatarynan S.Tkachýk óz qaqpasyn aman alyp qalyp otyr. Árıne, munda qorǵaýshylardyń da úlesi bar.
Shabýyldy uıymdastyrý kezinde «Aqjaıyq» oıynshylary dál pas bere almady. Tipti ózine qarsy tártip buzylǵannan keıin Malık Mane aıyp dobyn qaqpadan áldeqaıda joǵary tepti. Ekinshi taımda Ivan Antıpovtyń ornyna shyqqan, chempıonatta 8 golmen mergender kóshin bastap kele jatqan ýkraınalyq shabýylshy Aderınsola Habıb Eseola da jarqyraı kórine alǵan joq. Bálkim, ony birden oıynǵa qosý kerek pe edi, áıteýir alań ıeleri bul kezdesýde basymdylyq tanyta almady. Qaıta qyzylordalyqtar jeńistiń aýylyna bir taban jaqyn turdy deýge bolady.
«Aqjaıyq» bul týrdan keıin 17 upaımen besinshi orynda keledi.
Aıta keteıik, óz alańynda Taldyqorǵannyń «Jetisý» komandasyn 3:0 esebimen utqan astanalyqtar qorjynyndaǵy upaı sanyn 34-ke jetkizdi. Atyraýda jergilikti klýbty 3:1 esebimen tize búktirip, 29 upaı jınaǵan «Qaırat» burynǵysynsha ekinshi orynda. Áıtse de almatylyqtardyń elordalyqtardan eki oıyny kem. Syrt alańda Qaraǵandynyń «Shahterin» 1:0 esebimen utqan Qostanaıdyń «Tobyly» 26 upaımen úzdik úshtikti túıindep tur. Petropavlda «Qyzyljardy» 2:1 esebimen jeńgen «Ordabasy» (Shymkent) komandasy 19 upaımen tórtinshi orynǵa taban tiredi.
Aldaǵy beısenbi kúni, 31 mamyr kúni ótetin HІІІ týrda «Jetisý» - «Shahter», «Tobyl» - «Qyzyljar», «Ordabasy» - «Atyraý», «Qaırat» - «Aqtóbe», «Ertis» - «Aqjaıyq», «Qaısar» - «Astana» oıyndary ótedi.
