Fýtbol: «Aqjaıyq» pen «Qaırat» teń tarqasty
ORAL. QazAqparat – Fýtboldan Qazaqstan chempıonatynyń tórtinshi týrynda Oraldyń «Aqjaıyǵy» Almatynyń «Qaıratyn» qabyldady, dep habarlaıdy QazAqparat tilshisi.
Ótken jylǵy birinshilikte ýkraınalyq maman Vladımır Mazıar jattyqtyratyn oraldyqtar óz alańynda «Qaıratty» 1:0 esebimen súrindirip ketken edi.
Bıyl chempıonatta «Aqjaıyq» Qostanaıda «Tobylǵa», sodan keıin Shymkentte «Ordabasyǵa» ese jiberip, birde-bir gol soqpaǵan edi. Al «Turanmen» Oralda ótýi tıis oıyny aýa raıyna baılanysty keıinge qaldy.
Búgingi matchta Qostanaıda jaraqat alyp qalǵan shabýylshy Oralhan Ómirtaev qaıta oralsa, ýkraınalyq jartylaı qorǵaýshy Maksım Kalenchýk «Aqjaıyqqa» tyńnan qosyldy. Qaqpaǵa reseılik Stepan Sıkach tursa, qorǵaýshy Ardaq Sáýlet te birden alańǵa shyqty.
«Qaırattyń» bas bapkeri Qurban Berdyev bul joly jastarǵa kóbirek senim artyp, komandanyń surmergeni Hose Kante qosalqy quramda qaldy.
Birinshi taımda almatylyqtar sapyndaǵy brazılııalyq Joao Paýlo 19-mınýtta oryndaǵan aıyp doby qaqpa jaqtaýynan keri qaıtty.
Oıynnyń ekinshi kezeńinde «Qaırat» birneshe múmkindikti paıdalana almady. Báseke sońyna taman «Aqjaıyq» qorǵaýshysy Vıtalıı Prındeta ekinshi eskertý qaǵazyn alyp, alańnan qýyldy.
Osylaısha «Qaırat» pen «Aqjaıyq» teń tarqasty – 0:0.
Almatylyqtar 8 upaımen týrnır kestesinde ekinshi orynǵa kóterilse, oraldyqtar chempıonattaǵy alǵashqy upaıyna qol jetkizdi.
Kelesi týrda 9 sáýirde «Qaırat» Almatyda týrnır kestesinde kósh basyna kóterilgen Aqtaýdyń «Kaspııin» qabyldasa, «Aqjaıyq» Atyraýda jergilikti klýbpen kezdesedi.
Eske sala keteıik, budan buryn el chempıony «Tobyldyń» «Aqjaıyqtan» basym túskenin jazǵan bolatynbyz.
