Fýtbol: «Aqjaıyq» pen «Atyraý» teń oınady
ORAL. QazAqparat - Fýtboldan premer-lıga komandalary arasynda el chempıonatynyń kezekti týrynda Oraldyń «Aqjaıyǵy» óz alańynda «Atyraý» komandasyn qabyldady, dep habarlaıdy «QazAqparat» HAA tilshisi.
Bul oıynda alań ıeleriniń basymdylyǵy baıqalǵanymen, olar birneshe múmkindikti paıdalana almady. Birinshi taımda esep ashylmaǵanymen, esesine oıynnyń ekinshi kezeńinde tórt birdeı gol soǵyldy. 54-mınýtta standartty jaǵdaıdan keıin «Atyraýdyń» quramyndaǵy horvatııalyq legıoner ıÝre Obşıvats «Aqjaıyqtyń» qaqpasyn baspen dál kózdedi. Budan keıin alań ıeleri alǵa umtyldy. Vahıd Masýdov chılılik Matıas Rýbıonyń ornyna kolýmbııalyq Arenas Delgadony qosty. Bapkerdiń bul qadamy ózin aqtady deýge bolady. Kóp uzamaı 64-mınýtta taǵy da standatty jaǵdaıdan soń «Aqjaıyqtyń» kapıtany Meıram Sapanov tarazy basyn teńestirdi. Al 70-mınýtta Arenas Delgado toǵyzdyqty dál kózdep, óz komandasyn alǵa shyǵardy. Áıtse de «Aqjaıyq» jeńisti ýysynda ustap tura almady. 88-mınýtta tóreshi belgilegen 11 metrlik aıyp dobyn «Atyraýdan» serbııalyq Novıtsa Maksımovıch dál oryndap, esepti teńestirdi.
Sóıtip qos komanda 2:2 esebimen teń tarqasty. Qazirgi kezde tórt upaımen toǵyzynshy orynda kele jatqan «Aqjaıyq» kelesi oıynyn 8 sáýirde Aqtóbede jergilikti komandamen ótkizedi. Bul matchtyń da ońaıǵa túspesi anyq. Óıtkeni «Aqtóbe» osy týrda Pavlodarda el chempıonatynyń ótken jylǵy qola júldegeri «Ertis» komandasyn 3:1 esebimen utyp ketti.
Aıta keteıik, týrnır kestesinde «Ordabasy» (Shymkent) men «Qaısar» (Qyzylorda) komandalary 10 upaımen kósh bastap keledi. Bul týrda shymkenttikter qaqpashynyń óreskel qateliginen keıin Kókshetaýdyń «Oqjetpesin» 2:1 esebimen tize búktirse, qyzylordalyqtar Almatyda «Qaıratpen» (1:1) teń oınady. Qaraǵandynyń «Shahteri» «Astanaǵa» 1:2 esebimen ese jiberse, Qostanaıdyń «Tobyly» «Tarazdy» 1:0 esebimen utty.
