Fýtbol: «Aqjaıyq» pen «Aqtóbe» taǵy da teń oınady
ORAL. QazAqparat - Fýtboldan premer-lıga komandalary arasynda Qazaqstan chempıonatynyń 24-inshi týrynda Oraldyń «Aqjaıyǵy» óz alańynda «Aqtóbeni» qabyldady, dep habarlaıdy «QazAqparat» tilshisi.
Bul kezdesý kósh sońynda kele jatqan qos komanda úshin de mańyzdy edi. Birinshi taımda «Aqtóbeniń» qaqpashysy Andreı Sıdelnıkovtiń qateliginen keıin «Aqjaıyqqa» jańadan kelgen chernogorııalyq shabýylshy Marko Dýrovıch Qazaqstan chempıonatyndaǵy alǵashqy golyn soqty. Ekinshi taım basynda standartty jaǵdaıdan keıin kezinde «Aqjaıyq» quramynda dop tepken, qazir «Aqtóbeniń» namysyn qorǵaıtyn Belarýs shabýylshysy Igor Zenkovıch tarazy basyn teńestirdi. Degenmen 57-mınýtta M.Dýrovıch «Aqjaıyqty» qaıtadan alǵa shyǵardy. Al 82-mınýtta bas tóreshi Alekseı Bobrov óz aıyp alańynda Konstantın Dýdchenko qolmen oınady degendi jeleý etip, 11 metrlik penaltıdi belgiledi. Bul núkteden I.Zenkovıch múlt ketken joq. Osylaısha, tartysty oıyn 2:2 esebimen teń aıaqtaldy. Budan buryn 26 shilde kúni Oralda ótken 15-týrdyń matchynda da qarsylastar 2:2 esebimen teń tarqasqan bolatyn.
«Aqjaıyq» 20 upaımen 11-inshi orynda, odan bir upaıy kem «Aqtóbe» kósh sońynda keledi.
Aıta keteıik, 24-týrdyń qalǵan oıyndary jeksenbi kúni ótedi.
