Fýtbol: «Aqjaıyq» pen «Aqtóbe» syrt alańda jeńiske jetti
NUR-SULTAN. QazAqparat – Fýtboldan Qazaqstan chempıonaty besinshi týrynyń alǵashqy eki oıyny ótti, dep habarlaıdy QazAqparat tilshisi.
Aldymen Petropavl qalasynda jergilikti «Qyzyljar» «Aqtóbe» komandasyn qabyldady.
Osyǵan deıin jeńilip kórmegen alań ıeleri birinshi bolyp esep ashty. Shabýylǵa qosylǵan belorýs qorǵaýshysy Valerıı Karshakevıch 66-mınýtta mergendik tanytty.
Degenmen aqtóbelikter oıynǵa tyńnan qosylǵan fýtbolshylardyń kómegimen match sońynda jeńisti julyp aldy. Aldymen 90-mınýtta Dıdar Jalmuqan tarazy basyn
teńestirdi. Al 93-mınýtta Rıfat Nýrmýgamet esepti 2:1-ge jetkizdi.
Al ótken týrda «Tarazdan» 0:4 esebimen oısyraı utylǵannan keıin «Shahterdiń» bas bapkeri Alı Alıev ornynan ketip, ýaqytsha jattyqtyrýshy mindetin ataqty fýtbolshy Andreı Fınonchenko qolǵa alǵan bolatyn.
Óz alańy jaramsyz bolǵandyqtan, qaraǵandylyq klýb pen «Aqjaıyqtyń» matchy elordadaǵy «Astana Arena» stadıonynda ótti.
Kezdesý qaraǵandylyqtar úshin sátsiz bastaldy.
«Aqjaıyqtyń» shabýylshysy Vıacheslav Shvyrevpen soqtyǵysyp qalǵan «Shahterdiń» qaqpashysy Igor Shatskıı jaraqat alyp, ornyna Tımýrbek Zákirov shyqty.
Birinshi taım sońyna qaraı, 39-mınýtta qarsy shabýyl kezinde reseılik Evgenıı Kozlovtyń T.Zákirovten asyra salǵan dobyn ganalyq qorǵaýshy Gıdeon Baa óz qaqpasyna toǵytty. Degenmen 44-mınýtta Aıdos Táttibaev qarymta gol soqty – 1:1.
Ekinshi taımda 73-mınýtta qonaqtar aıyp dobyn oryndady.
Osy sátte taǵy bir qaraǵandylyq qorǵaýshy Davıd Atanaskoskı óz qaqpasyna gol soǵyp aldy.
Sóıtip sáttilik serik bolǵan «Aqjaıyq» 2:1 esebimen jeńiske jetti.
Budan keıin aqtóbelikter 9 upaımen týrnır kestesinde ekinshi, oraldyqtar segizinshi orynǵa kóterildi.
18 sáýir kúni ótetin altynshy týrda «Aqtóbe» «Shahterdi» qabyldasa, «Aqjaıyq» syrt alańda «Tarazben» oınaıdy.
Eske sala keteıik, budan buryn «Aqjaıyqtyń» óz alańynda «Qyzyljarǵa» ese jibergenin jazǵan bolatynbyz.
