Fýtbol: «Aqjaıyq» pen «Aqtóbe» komandalary teń oınady
ORAL. QazAqparat - Fýtboldan el birinshiliginiń HH týrynda Oraldyń «Aqjaıyǵy» óz alańynda «Aqtóbe» komandasyn qabyldady, dep habarlaıdy QazAqparat tilshisi.
Týrnır kestesinde bir-birimen quıryq tistesip kele jatqan qos komanda úshin de bul kezdesý asa mańyzdy edi.
Osy aptada oraldyq klýbtyń tizginin ustaǵan ýkraınalyq maman Sergeı Zaıtsev quramǵa kóp ózgeris engize qoıǵan joq. Tek Latvııa quramasynyń oıynshysy Artýr Karashaýsks alańǵa birden shyqpaı, horvatııalyq qorǵaýshy Denıs Glavınaǵa senim artyldy. 
Birinshi taım barysynda aqtóbelikter birneshe ret gol soǵatyn múmkindikti múlt jiberdi. Chempıonattyń surmergeni, armenııalyq shabýylshy Markos Pızzellı «Aqjaıyqtyń» qaqpashysy Evgenıı Borovık qaıtarǵan dopty qıys tepti. Keıin dál osyndaı jaǵdaıda Baǵdad Qaıyrovtyń soqqan doby qaqpashynyń qolynan tabyldy.
Taım sońyna taman Erkin Tapalov Jambyl Kókeevke qarsy oıyn tártibin buzǵannan keıin aıyp doby belgilendi. M.Pızzellı asyrǵan dopty «Aqtóbe» sapyndaǵy frantsııalyq legıoner Jan-Ed Morıs baspen torǵa dál túsirdi.
Ekinshi taımnyń ortasyna taman S.Zaıtsev oraldyqtardyń oıynyna jan kirgizbek nıetpen Ivan Antıpov pen senegaldyq Malık Maneniń ornyna Erkebulan Nurǵalıev pen A.Karashaýsksty kirgizdi. Sálden soń A.Karashaýskstyń pasynan keıin alań ıeleri gol soǵyp kete jazdady. Ýkraınalyq legıoner Andreı Tkachýkqa dáldik jetispedi.
«Aqjaıyq» tarazy basyn teńestirý úshin baryn saldy. 85-mınýtta A.Tkachýktyń aıyp alańyna kirmesten tepken doby qaqpa buryshynan bir shyqty.
Negizgi ýaqytqa bes mınýt qosylǵan kezde de qonaqtar basymdyq tanytyp, jeńiske umtylǵanymen, oraldyqtar teń oıyndy saqtap qala aldy.
Sóıtip 1:1 esebimen teń tarqasqan «Aqtóbe» men «Aqjaıyq» komandalary upaı sanyn 24-ke jetkizdi. Olardy búgin óz alańynda «Qyzyljardy» 2:1 esebimen tize búktirgen Qyzylordanyń «Qaısary» qýyp jetti. Osy úsh komanda besinshi-jetinshi oryndardy bólisýde.
