Fýtbol: «Aqjaıyq» óz alańynda «Jetisý» komandasyn utty
ORAL. QazAqparat - Fýtboldan el chempıonatynyń on birinshi týrynda Oraldyń «Aqjaıyǵy» óz alańynda «Jetisý» komandasyn qabyldap, 2:0 esebimen utty, dep habarlaıdy QazAqparat tilshisi.
Bul jeńis oraldyqtarǵa ońaılyqpen kelgen joq. Osynyń aldynda Aqtóbede 3:5 esebimen utylǵannan keıin komandaǵa bas bapkerdiń mindetin atqarýshy, jergilikti maman Artýr Avakıantstyń basshylyq etýine týra keldi.
Birinshi taımda alań ıeleriniń adymy ashyla qoıǵan joq. Qazaqstandyq belgili jattyqtyrýshy Dmıtrıı Ogaı baptaıtyn taldyqorǵandyqtar kóbirek shabýyldady. «Aqjaıyqtyń» oıyny júrmedi dese de bolady.
Oıynnyń ekinshi kezeńinde ǵana alań ıeleriniń ekinshi tynysy ashylǵandaı boldy. Kóp uzamaı Ivan Antıpov pen ýkraınalyq legıoner Aderınsola Habıb Eseola qaqpashyǵa ekeýi birdeı shyqqanymen, dáldik jetispedi. Degenmen 67-mınýtta Rýslan Qaıyrovtyń pasynan keıin Eseola óz múmkindigin múlt jibermeı, baspen dopty qaqpa buryshyna dál túsirdi.
Ekinshi taımda Artýr Avakıants taǵy bir ýkraınalyq legıoner Igor Hýdobıak pen senegaldyq Malık Maneni oıynǵa qosty. Ásirese, M.Maneniń dopty ustaýdaǵy sheberligi anyq kórindi. 80-mınýtta dál sol M.Maneniń pasynan keıin Eseola esepti 2:0-ge jetkizdi. Bul onyń osy chempıonattaǵy jetinshi goly edi. Sóıtip ol mergender kóshin bastady.
Kezdesý barysynda «Aqjaıyqtyń» qaqpashysy Sergeı Tkachýk ta barynsha sátti oınap, birneshe ret qaýipti soqqylardy qaıtara bildi.
Bul týrdan keıin «Aqjaıyq» týrnır kestesinde qaıtadan altynshy orynǵa kóterildi. 23 mamyr kúni oraldyqtar birinshilikte 31 upaımen jekedara kósh bastap kele jatqan «Astana» komandasyn qabyldaıdy. Bul HHІІ týrdyń kezdesýi bolǵanymen, qos komandanyń kelisýine baılanysty osy kúnge alǵa ysyrylǵan bolatyn.
Aıta keteıik, búgin elordalyqtar «Aqtóbeni» 3:1 esebimen tize búktirse, «Qaırat» Almatyda Qaraǵandynyń «Shahterin» (2:0) jeńdi. Astanalyqtardan bir oıyny kem almatylyqtar 26 upaımen ekinshi orynda keledi. Shymkentte «Ordabasyny» 1:0 esebimen qapy qaldyrǵan Qostanaıdyń «Tobyly» 22 upaımen úshinshi satyǵa nyq bekı tústi. Shymkenttikter 16 upaımen tórtinshi orynda qaldy. Eń iri esep Pavlodarda tirkeldi. «Qyzyljardy» 5:0 esebimen oısyrata utqan «Ertis» besinshi orynǵa kóterildi.
Ekinshi aınalym oıyndary 27 mamyr kúni bastalady. Bul kúni HІІ týrda «Astana» - «Jetisý», «Aqjaıyq» - «Qaısar», «Aqtóbe» - «Ertis», «Atyraý» - «Qaırat», «Qyzyljar» - «Ordabasy», «Shahter» - «Tobyl» kezdesýleri ótedi.
