Fýtbol: «Aqjaıyq» óz alańynda «Tobyldan» utylyp qaldy
ORAL. QazAqparat - Búgin el birinshiliginiń HVІ týrynda Oraldyń «Aqjaıyǵy» óz alańynda Qostanaıdyń «Tobylyn» qabyldady, dep habarlaıdy QazAqparat tilshisi.
Osynyń aldynda «Aqjaıyq» úsh márte qatarynan jeńilis tapsa, týrnır kestesinde úshinshi orynda kele jatqan qostanaılyqtar ótken týrda óz alańynda «Aqtóbege» ese jibergen-di. Sondyqtan qos komandaǵa da jeńis aýadaı qajet bolatyn.
«Aqjaıyqtyń» bas bapkeriniń mindetin atqarýshy Artýr Avakıants bul joly qaqpaǵa qazaqstandyq Sergeı Tkachýkty qoıdy.
Birinshi taım alań ıeleriniń basymdylyǵymen ótkenimen, esep ashylmady.
Oıynnyń ekinshi kezeńinde «Aqjaıyqtyń» qorǵaýshylary men qaqpashysy jıi qatelik jiberdi. 22 sáýir kúni Zatobolskide ótken oraldyqtarmen matchta alańǵa ekinshi taımda shyqqan Tańat Nóserbaev tarazy basyn teńestirip ketken bolatyn. Bul joly Tańat 56-ynshy jáne 62-inshi mınýttarda mergendik tanytyp, qos goldyń avtory atandy. 88-mınýtta grýzııalyq legıoner Djaba Kankava esepti 3:0-ge jetkizdi. Tek 95-mınýtta «Aqjaıyqtyń» kapıtany Meıram Sapanov esepti qysqarta aldy.
Osylaısha 3:1 esebimen jeńgen «Tobyl» upaı sanyn 31-ge jetkizdi.
Qatarynan tórt ret utylǵan oraldyqtardyń jaǵdaıy qıyndaı tústi. 7 shilde kúni batysqazaqstandyqtar Qaraǵandyda jergilikti «Shahtermen» kúsh synasady.
Eske sala keteıik, el chempıony «Astana» komandasynyń keshe óz alańynda «Ordabasydan» jeńisti sońǵy mınýttarda julyp alǵanyn jazǵan bolatynbyz.
