Fýtbol: «Aqjaıyq» óz alańynda «Shahterge» ese jiberdi
ORAL. QazAqparat - Fýtboldan premer-lıga komandalary arasynda QR chempıonatynyń 28-týrynda Oraldyń «Aqjaıyǵy» óz alańynda Qaraǵandynyń «Shahterin» qabyldap, 1:2 esebimen utylyp qaldy, dep habarlaıdy «QazAqparat» tilshisi.
Birinshi taım qaraǵandylyqtardyń basymdylyǵymen ótti deýge bolady. 34-mınýtta sol qaptaldan berilgen pasty «Shahter» sapyndaǵy slovakııalyq legıoner Shtefan Zoshak ortalyq tustan esh kedergisiz qaqpaǵa súńgite saldy. Ekinshi taım basynda alań ıeleri alǵa umtylyp baqty. Sondaı sátterdiń birinde qorǵaýshylar qaıtarǵan dopty Azat Ersálimov qabyldap, aıyp alańyna kirmesten qaqpa toǵyzdyǵyn dál kózdedi. Kezdesý teń aıaqtalatyndaı kóringen. Alaıda 92-mınýtta qaqpashy Vıacheslav Kotlıarmen jekedara shyqqan nıgerııalyq Olýkorede Aıegbýsı jeńis dobyn soǵyp ketti. Bul rette «Aqjaıyqtyń» qorǵanys shebindegi oıynshylarǵa jınaqylyq jetispedi.
Osy týrdan keıin «Shahter» 33 upaımen altynshy orynda qalsa, 29 upaıy bar «Aqjaıyq» burynǵysynsha toǵyzynshy satyda keledi. Áıtse de buǵan deıin úsh márte jeńiske qol jetkizgen Vahıd Masýdov shákirtteriniń jaǵdaıy taǵy qıyndady. Óıtkeni qalǵan tórt oıynnyń úsheýin oraldyqtar syrt alańda kil kósh bastaýshy komandalarmen («Ordabasy», «Qaırat», «Astana») ótkizedi. Tek bir ǵana oıynda óz alańynda Qyzylordanyń «Qaısaryn» qabyldaıdy.
Aıta keteıik, ótken týrda «Astana» «Tarazdy» 2:0 esebimen tize búktirse, chempıondyqtan úmitker ekinshi komanda Almatynyń «Qaıraty» Qostanaıdyń «Tobylyn» dál osyndaı eseppen utty. Sońǵy oryndaǵy Kókshetaýdyń «Oqjetpesi» óz alańynda «Atyraýdan» 1:2 esebimen jeńilip qalsa, Pavlodardyń «Ertisi» Shymkentte «Ordabasyny» sondaı nátıjemen utyp ketti. «Aqtóbe» óz alańynda «Qaısarǵa» 0:1 esebimen ese jiberdi.
