Fýtbol: «Aqjaıyq» óz alańynda «Oqjetpesten» jeńilip qaldy
ORAL. QazAqparat - Fýtboldan premer-lıga komandalary arasynda el chempıonatynyń tórtinshi týrynda Oraldyń «Aqjaıyǵy» óz alańynda Kókshetaýdyń «Oqjetpesin» qabyldady.
Bul kezdesýde «Aqjaıyqtyń» bas bapkeri Talǵat Baısýfınov ótken týrda «Qaıratpen» oınaǵan quramdy ózgertpesten, qaıta shyǵardy.
Alaıda alań ıeleri sylbyr qımyldap, dopty qonaqtarǵa berip qoıdy. Bir-birine dál pas berip, úılesimdi oınap, kombınatsııalar uıymdastyrý jóninen reseılik belgili bapker Vladımır Mýhanovtyń shákirtteri eptilik kórsetti. Dál osy kúni «Oqjetpestiń» kapıtany, shabýylshy Álibek Bóleshev týra 35 jasqa toldy. Muny komandalastarynyń kómegimen Á.Bóleshev golmen atap ótti. 25-mınýtta buryn «Aqtóbede» oınaǵan Marat Haırýllın buryshtamadan dop bergen sátte Anton Kýksın ony baspen baǵyttady. Sony kútip turǵandaı, Á.Bóleshev baspen dopty torda týlatty.
T.Baısýfınov fýtbolshylardy almastyryp, oıynǵa jan kirgizýge tyrysty. 76-mınýtta astanalyq tóreshi Tımýr Qumashev alań ıeleriniń paıdasyna aıyp dobyn belgiledi. Dopty tez oıynǵa qosqan oraldyqtar gol soqqanmen, ony tóreshi «Ysqyryqty kútpedi» degen jeleýmen eseptemeı tastady. Áıtse de ózi mundaı belgi bergen joq edi. Bul jankúıerlerdiń narazylyǵyn týǵyzdy.
Match bitýge on mınýttaı qalǵanda, «Oqjetpes» quramynda alańǵa shyqqan Rısto Rıstovıch qosymsha ýaqyt qosylǵan kezde alystan qaqpa buryshyn dál kózdep, Roman Bagaýtdınovty qapy qaldyrdy. Sóıtip oıyn 0:2 esebimen kókshelikterdiń paıdasyna aıaqtaldy.
Óz alańynda Almatynyń «Qaıratyn» jeńgenmen, «Ertis» pen «Oqjetpesten» eki márte utylyp, jaǵdaıyn biraz qıyndatyp alǵan «Aqjaıyq» kelesi kezdesýin 13 sáýir kúni Tarazda jergilikti komandamen ótkizedi.
