Fýtbol: «Aqjaıyq» óz alańynda «Oqjetpespen» teń oınady
ORAL. QazAqparat - Búgin fýtboldan premer-lıga komandalary arasyndaǵy el birinshiliginiń altynshy týrynda Oraldyń «Aqjaıyǵy» óz alańynda Kókshetaýdyń «Oqjetpesin» qabyldap, 1:1 esebimen teń tústi, dep habarlaıdy «QazAqparat» tilshisi.
Bul kezdesýde esepti meımandar ashty. 18-mınýtta standartty jaǵdaıdan keıin Aleksandr Marochkın baspen soqqan dop qaqpa mańdaıshasyna tıip, kirip ketti. «Aqjaıyqtyń» qaqpashysy Denıs Tólebaevtyń boıy 2 metr bolǵanymen, sylbyr qımyldap, qapy qaldy.
Jalpy, bul matchta «Aqjaıyqtyń» oıyny júre qoıǵan joq. Tek kolýmbııalyq legıoner Djoan Arenas Delgadonyń tehnıkalyq sheberligi, shabýyldy uıymdastyrýǵa degen umtylysy kórinip turdy. Sondaı-aq oń qaptaldaǵy Azat Ersalımovtyń belsendiligin atap ótýge bolady. Birinshi taımnyń sońǵy mınýtynda Azat gol soǵatyn múmkindikti jiberip aldy.
Ekinshi taımda alań ıeleri alǵa umtylǵanymen, ol pálendeı nátıje bergen joq. Esesine qonaqtar esepti ulǵaıta jazdady. Degenmen 90-mınýtta serbııalyq Predrag Govedarıtsanyń aıyp alańyna kirmesten, shirene tartqan doby toǵyzdyqtan bir-aq shyqty. Sóıtip ol óz komandasyn jeńilisten saqtap qaldy.
Bul týrdan keıin 6 upaı jınaǵan «Aqjaıyq» týrnır kestesinde jetinshi orynǵa kóterildi. Vahıd Masýdovtyń shákirtteri kelesi oıynyn 16 sáýir kúni Tarazda jergilikti komandamen ótkizedi.
Aıta keteıik, dál osy «Tarazdy» Pavlodarda 5:2 esebimen oısyrata utqan «Ertis» 14 upaımen jekedara kósh bastady. «Aqtóbeni» 3:0 esebimen tizerletken «Astana» 13 upaımen ekinshi orynǵa kóterildi.
Osyǵan deıin kósh bastaǵan Qyzylordanyń «Qaısaryn» Shymkentte 1:0 esebimen jeńgen «Ordabasy» úshinshi satyǵa jaıǵasty. Onyń da qorjynynda 13 upaı bar. Qostanaıdyń «Tobyly» men Almatynyń «Qaıraty» 2:2 esebimen teń tarqasyp, sáıkesinshe tórtinshi jáne altynshy orynda keledi. Al kósh sońyndaǵy «Atyraý» men Qaraǵandynyń «Shahteri» árqaısysy úsh goldan soǵyp, bir upaıdan enshiledi.
