Fýtbol: «Aqjaıyq» óz alańynda «Qyzyljardy» utty
ORAL. QazAqparat - Fýtboldan el birinshiliginiń kezekti týrynda Oraldyń "Aqjaıyǵy" óz alańynda Petropavldyń "Qyzyljaryn" qabyldady, dep habarlaıdy QazAqparat tilshisi.
Alań ıeleri alǵashqy shabýylynda-aq esep ashty.
Oń qanattan Igor Hýdobıak pen Azat Ersálimovtiń pasynan keıin "Aqjaıyqtyń" surmergeni, senegaldyq Malık Mane baspen dál urdy.
Budan keıin qonaqtar tarazy basyn teńestirýge tyrysqanymen, eshteńe ónbedi.
Ekinshi taımda Malık Maneniń aıyp alańyna kirmesten shirene tepken doby qaqpadan bir-aq shyqty. Bul Maneniń bıylǵy birinshiliktegi jetinshi goly edi.
Osylaısha 2:0 esebimen jeńiske jetken oraldyqtar týrnır kestesindegi jaǵdaıyn birshama jaqsarta tústi.
Aıta keteıik, bul oıynnan keıin 23 upaı jınaǵan "Aqjaıyq" týrnır kestesinde tórtinshi orynǵa kóterildi. Óz alańynda Qaraǵandynyń "Shahterin" 2:0 esebimen jeńgen "Astana" upaı sanyn 50-ge jetkizip, jekedara kósh bastap keledi.
"Qaısar" (Qyzylorda) men "Tobyl" (Qostanaı) komandalary 2:2 esebimen teń tarqasty.
