Fýtbol: «Aqjaıyq» óz alańynda «Qaısardan» utylyp qaldy
ORAL. QazAqparat - Fýtboldan el chempıonatynyń HHHІ týrynda «Aqjaıyq» óz alańynda Qyzylordanyń «Qaısaryn» qabyldady, dep habarlaıdy QazAqparat tilshisi.
Bul báseke qos komanda úshin de asa mańyzdy edi. Qyzylordalyqtar tórtinshi orynnan úmitin úzbese, oraldyqtar birinshi lıgaǵa túsip qalmaý úshin baryn salyp júrgen-di.
«Aqjaıyqtyń» bas bapkeri, ýkraınalyq maman Sergeı Zaıtsev bul joly qaqpaǵa otandasy Evgenıı Borovık emes, qazaqstandyq Sergeı Tkachýkty qoıdy. Sondaı-aq horvatııalyq qorǵaýshy Denıs Glavına birden alańǵa shyqty.
Oıyn oraldyqtardyń shabýylymen bastaldy. Alaıda «Qaısardyń» qaqpashysy Aleksandr Grıgorenko bastaǵan qonaqtardyń qorǵanys shebi syr bergen joq. Alań ıeleri jeti ret buryshtamadan dop bergenimen, odan esh nátıje shyǵara almady. Esesine bolgarııalyq maman Stoıcho Mladenov jattyqtyratyn qyzylordalyqtar birinshi taım sońyna taman buryshtamadan alǵash ret dop berýi muń eken, serbııalyq Bratıslav Pýnoshevats baspen dál soǵa bildi. Bul onyń bıylǵy maýsymdaǵy onynshy goly edi.
Ekinshi taımda alań ıeleri tarazy basyn teńestirýge umtylǵanymen, aldymen «Qaısardyń» quramyndaǵy ýkraınalyq Vladımır Arjanov sodan keıin frantsııalyq Matıas Kýror mergendigimen kózge tústi. Match sońynda kezinde «Aqjaıyqtyń» quramynda dop tepken belorýs Igor Zenkovıch esepti 4:0-ge jetkizdi.
Osylaısha óz alańynda iri eseppen oısyraı utylǵan «Aqjaıyq» 30 upaımen 11-orynǵa syrǵydy. Qalǵan eki matchty syrt alańda ótkizetin S.Zaıtsev shákirtteriniń premer-lıgada qalý múmkindigi múldem azaıdy deýge bolady.
Aıta keteıik, bul týrda Pavlodardyń «Ertisi» Almatyda «Qaıratty» 1:0 esebimen (gol soqqan komanda kapıtany, portýgalııalyq legıoner Karlýsh Fonseka) tize búktirip, 32 upaımen oraldyqtardy basyp ozyp, onynshy orynǵa kóterildi. «Jetisý» men «Atyraý» (0:0), «Ordabasy» men «Shahter» (1:1) komandalary upaı bólisti. Qaraǵandylyqtar 29 upaımen sońǵy, 12-inshi orynda keledi.
Almatylyqtar jeńilip qalǵandyqtan, «Astana» komandasy keıingi kezdesýlerdiń nátıjesine qaramastan, besinshi márte qatarynan el chempıony atandy.
3 qarasha kúni «Ertis» óz alańynda «Aqjaıyqty» qabyldaıdy, mine, osy matchta oraldyqtar jeńse ǵana úmit qaıta oıanady.
