Fýtbol: «Aqjaıyq» óz alańynda «Qaıratqa» ese jiberdi
ORAL. QazAqparat - Fýtboldan el birinshiliginiń HІV týrynda Oraldyń «Aqjaıyǵy» óz alańynda kósh bastaýshylardyń biri - Almatynyń «Qaıratyn» qabyldady, dep habarlaıdy QazAqparat tilshisi.
Almatylyqtardy bul joly komanda kapıtany Islambek Qýat bastap shyqty. «Qaırattyń» quramynda alty birdeı legıoner oınasa, «Aqjaıyqta» tórt ýkraınalyq fýtbolshy men senegaldyq shabýylshy Malık Mane boldy.
Birinshi taımda ýkraınalyq qaqpashy Evgenıı Borovık I.Qýat, Magomed Paragýlgov, Isaeldiń qaýipti soqqylaryn qaıtara bildi. Degenmen 42-mınýtta reseılik Andreı Arshavın óz sheberligin kórsetip, qaqpa buryshyn dál kózdeı bildi.
Ekinshi taımda Malık Manemen birge shabýyl shebinde júrgen Qazaqstan jastar quramasynyń múshesi Ivan Antıpov Erkin Tapalovtyń pasynan keıin «Qaırattyń» qaqpashysy Vladımır Plotnıkov dopty ýysynan shyǵaryp alǵan sátti paıdalana almady. Aıaǵyna qaqpashynyń qoly tıgen I.Antıpov qulap qalǵanmen, tóreshi Fýrkat Atajanov tártip buzyldy dep sanamady.
Kóp uzamaı qarymta shabýyldan keıin A.Arshavınniń pasyn múlt jibermegen horvatııalyq legıoner Ivo Ilıchevıch 70-mınýtta esepti eselep, 2:0-ge jetkizdi.
Bul kezdesýde «Aqjaıyqtyń» quramynda ushqyr shabýylshy, ýkraınalyq Aderınsola Eseolanyń joqtyǵy sezilip turdy. «Qaıratqa» aýysyp ketken ol almatylyqtardyń sapynda aldaǵy shilde aıynan bastap oınaı alady. Sondyqtan oraldyqtar kóbinese jalǵyz M.Manege úmit artýǵa májbúr bolyp qaldy. Shabýyl shebin kúsheıtetindeı fýtbolshy da az. Almatylyqtardan úsh birdeı oıynshy, sonyń ishinde Baýyrjan Islamhan tyńnan qosylsa, «Aqjaıyqtyń» bas bapkeri mindetin atqarýshy Artýr Avakıants I.Antıpovtiń ornyna Erkebulan Nurǵalıevti ǵana qosa aldy. Aqyry dál sol Erkebulannyń pasynan keıin oń qanattan sýyrylyp shyqqan M.Mane 87-mınýtta esepti qysqarta aldy. Budan keıin E.Nurǵalıevtiń taǵy bir pasynan keıin M.Mane dopty toqtatamyn degenshe, almatylyq qorǵaýshylar soǵýǵa múmkindik bergen joq.
Osylaısha almatylyqtar 2:1 esebimen jeńiske jetip, 35 upaımen burynǵysha ekinshi orynda keledi. «Qaırattyń» elordalyqtardan bes upaıy az bolǵanymen, eki oıyndy kem ótkizdi.
Aıta keteıik, bul týrda óz alańynda Pavlodardyń «Ertisin» 3:0 esebimen oısyrata utqan «Astana» komandasy upaı sanyn 40-qa jetkizdi. Atyraýda jergilikti komandany 2:0 esebimen súrindirgen Qostanaıdyń «Tobyly» 28 upaımen úzdik úshtikti túıindep tur.
