Fýtbol: «Aqjaıyq» óz alańynda el chempıony «Qaıratty» utty
ORAL. QazAqparat – Fýtboldan Qazaqstan chempıonatynyń 11-týrynda Oraldyń «Aqjaıyǵy» óz alańynda Almatynyń «Qaıratyn» qabyldady, dep habarlaıdy QazAqparat tilshisi.
El chempıony «Qaırat» buǵan deıin 17 upaımen úshinshi orynda kele jatsa, odan eki upaıy kem oraldyq komanda 5-satyda edi.
«Aqjaıyqtyń» quramynda ótken oıynda jaraqat alyp qalǵan qaqpashy Sergeı Lıtovchenkonyń ornyna Ilıa Karavaev shyqty.
Birinshi taımda almatylyqtar kóbirek shabýyldaǵanymen, esep ashylǵan joq.
Oıynnyń ekinshi kezeńinde 54-mınýtta qarymta shabýyl kezinde «Aqjaıyq» sapyndaǵy belorýssııalyq qorǵaýshy Pavel Nazarenko alǵa shyǵyp ketken «Qaırattyń» qaqpashysy, Oral fýtbolynyń túlegi Stas Pokatılovtan dopty asyra saldy.
Match sońyna taman buryshtamadan berilgen dopty «Qaırat» quramyndaǵy serbııalyq qorǵaýshy Rade Dýgalıch baspen soqqanymen, ol qaqpa jaqtaýynan keri qaıtty.
Osylaısha premer-lıgadaǵy bıýdjeti eń az klýb bolǵanyna qaramastan, bıyl qarqyndy oıyn órnegin kórsetip kele jatqan «Aqjaıyq» qatarynan úshinshi jeńisine qol jetkizdi – 1:0.
Týrnır kestesinde 18 upaımen úshinshi orynǵa kóterilgen ýkraınalyq maman Vladımır Mazıardyń shákirtteri kelesi kezdesýin 18 mamyr kúni syrt alańda «Turanmen» ótkizedi.
Eske sala keteıik, budan buryn «Aqjaıyqtyń» Qyzylordada «Qaısardan» basym túskenin jazǵan bolatynbyz.
Foto: Aıbatyr Nurash
