FÝTBOL: «Aqjaıyq» óz alańynda «Ekibastuzdy» oısyrata jeńdi
ORAL. QazAqparat - Fýtboldan Qazaqstan chempıonaty birinshi lıgasynyń ekinshi týrynda Oraldyń «Aqjaıyǵy» óz alańynda «Ekibastuzdy» qabyldady.
Betashar týrda Temirtaýda «Bolattan» utylyp qalǵan batysqazaqstandyqtar bul joly jeńiske degen nyq senimmen shyqty. Olardyń sheberligi basym ekendigi oıyn barysynda aıqyn kórindi. Kóp uzamaı, alań ıelerinen Rýslan Valıýllın qonaqtar qaqpasyn baspen dál kózdese, odan keıin slovenııalyq legıoner Marýshko Matıts mergendik kórsetti. «Ekibastuzdyń» qaqpasyna belgilengen 11 metrlik aıyp dobyn Vladımır Fomıchev qaıtarǵanymen, Oleg Hromtsov oǵan birinshi bolyp jetip, ekinshi soqqysymen esepti 3:0-ge jetkizdi. Ekinshi taımda ekibastuzdyqtar qaqpashysyn aýystyrýǵa májbúr boldy. Rýstam Aıdarǵalıev «Aqjaıyqtyń» kapıtany Meıram Sapanovtyń alystan baǵyttaǵan dobyn qaıtaryp úlgergenimen, ushqyrlyq tanytqan R.Valıýllın taǵy bir goldyń avtory atandy. Budan keıin Rýslannyń da, basqalarynyń da dop soǵatyndaı áldeneshe ret múmkindikteri bolǵanymen, ony paıdalana almady. Birde qaqpashy sátti qaıtara bilse, endi birde dop qaqpa mańdaıshasyna nemese jaqtaýyna tıip, tipti, qıys ketip jatty. Esesine, qonaqtardyń kapıtany Azamat Áýbákirov penaltıdi dál oryndap, esepti qysqartty. Biraq oıyn sońyna taman Marýshko Matıts ekinshi, bıylǵy maýsymdaǵy úshinshi dobyn soqty. Sóıtip «Aqjaıyq» 5:1 esebimen jeńiske jetti.
Sergeı Volgınniń shákirtteri kelesi oıynyn 25 sáýirde syrt alańda «Maqtaaralmen» ótkizedi. Sodan keıin 29 sáýirde Qazaqstan kýbogy úshin oıynda «Aqtóbe» komandasyn qabyldaıdy.
Aıta keteıik, bıyl da premer-lıgaǵa qaıta oralýdy maqsat etip otyrǵan «Aqjaıyq» klýbynyń 2015 jylǵy bıýdjeti - 439 mln. teńge.
