Fýtbol: «Aqjaıyq» óz alańynda «Astanaǵa» ese jiberdi
ORAL. QazAqparat - Fýtboldan el chempıonaty HHVІІ týrynyń sońǵy matchynda «Aqjaıyq» óz alańynda «Astana» komandasyn qabyldady, dep habarlaıdy QazAqparat tilshisi.
Beısenbi kúni Eýropa lıgasy oıynynda Kıevte «Dınamomen» 2:2 esebimen teń túsken astanalyqtar bul básekege barynsha daıyn quramany shyǵardy.
Senbi kúni el chempıondyǵynan úmitker Almatynyń «Qaıraty» Taldyqorǵanda «Jetisý» komandasynan 0:1 esebimen utylyp qalǵannan keıin «Astanaǵa» upaı aıyrmashylyǵyn ulǵaıtýǵa keremet múmkindik týǵan-dy.
Ótken týrda Almatyda «Qaıratty» utyp, tarıhı jeńisine qol jetkizgen oraldyqtar sapynda ózgeris bola qoıǵan joq.
Qos komanda úshin asa mańyzdy básekede aldymen alań ıeleri Nenad Erıch qorǵaǵan qaqpanyń kiltin tapqanymen, tarazdyq tóreshi Ashat Abdanbaev ony «Aqjaıyq» fýtbolshylary oıynnan tys qaldy degen sebeppen eseptemedi.
Birinshi taımnyń ortasynda «Aqjaıyqtyń» aıyp alańyna áýelete asyrylǵan dop ortalyq qorǵaýshy, ýkraınalyq Sergeı Basovtyń qolyna tıip, tóreshi 11 metrlik penaltı belgiledi. 23-mınýtta bul núkteden Rıchard Almeıda múlt ketken joq. Іle-shala alań ıeleri aıyp dobyn oryndaýǵa múmkindik aldy. Alaıda qarymta shabýyldy keremet paıdalanǵan elordalyqtar esepti ulǵaıtty. 26-mınýtta sol qaptaldan berilgen Roman Murtazaevtyń pasynan keıin «Astananyń» surmergeni Alekseı Şetkın ýkraınalyq qaqpashy Evgenıı Borovıkti qapy qaldyrdy - 2:0.
Budan keıin alań ıeleri alǵa umtylyp baqty. Sondaı sátterdiń birinde, 36-mınýtta Azat Ersálimov tepken dopty N.Erıch qaıtarǵanymen, ol qaqpa mańdaıshasyna tıip, keri qaıtty. Sosyn qaqpashy ustap úlgermegen dopty Latvııa ulttyq quramasynyń múshesi Artýr Karashaýsks qaqshyp alyp, torda týlatty - 1:2.
Ekinshi taımda oraldyqtar sapynda Qazaqstan jastar quramasynyń múshesi Ivan Antıpov, sosyn A.Karashaýskstiń ornyna ýkraınalyq legıoner Igor Hýdobıak shyqty. Ýkraınalyq bapker Sergeı Zaıtsev Erkebulan Nurǵalıevti Rýslan Qaıyrovpen almastyrdy. Grıgorıı Babaıan jattyqtyratyn elordalyqtar quramynda da ózgerister bolmaı qalǵan joq. Astanalyqtar dopqa kóbirek ıelik etip, oıyn tizginin ýysynan shyǵarmady.
Osylaısha elordalyqtar 2:1 esebimen jeńiske jetti.
Bul týrdan keıin kósh basyndaǵy «Astana» upaı sanyn 61-ge jetkizip, «Qaırattan» (54 upaı) uzaı tústi. «Aqjaıyq» segizinshi orynǵa syrǵydy.
Aıta keteıik, 26 qyrkúıek kúni kelesi, HHVІІІ týrda «Aqtóbe» - «Ertis», «Jetisý» - «Ordabasy», «Aqjaıyq» - «Tobyl», «Qaısar» - «Qaırat», «Atyraý» - «Astana», «Qyzyljar» - «Shahter» kezdesýleri ótedi.
