Fýtbol: «Aqjaıyq» óz alańynda «Aqtóbeni» tize búktirdi
ORAL. QazAqparat – Fýtboldan Qazaqstan chempıonatynyń jetinshi týrynda Oraldyń «Aqjaıyǵy» óz alańynda «Aqtóbeni» qabyldady, dep habarlaıdy QazAqparat tilshisi.
Ótken kezdesýde syrt alańda «Tarazdan» jeńilip qalǵandyqtan, «Aqjaıyqtyń» bas bapkeri, ýkraınalyq Vladımır Mazıar quramǵa birqatar ózgerister engizdi.
Atap aıtqanda, Oral fýtbolynyń túlegi Ivan Antıpov pen belorýssııalyq qorǵaýshy Pavel Nazarenko oıynǵa birden qosyldy. Bul óz jemisin berdi deýge bolady. 12-mınýtta dál osy P.Nazarenkodan pas alǵan I.Antıpov bıylǵy maýsymdaǵy óziniń alǵashqy golyn soqty – 1:0.
Alań ıeleriniń budan keıin de esepti eseleıtindeı múmkindikteri boldy. «Aqtóbe» qaqpashysy Jasýr Narzıkýlov eki ret goldan qutqarsa, endi birde Erkin Tapalovtyń tepken doby qaqpadan sál qıys ketti.
Ekinshi taımda aqtóbelikter kóbirek shabýyldaǵanymen, esep ózgergen joq. Esesine 78-mınýtta qonaqtardyń qaqpasyna qaraı jekedara shyǵyp bara jatqan ýkraınalyq shabýylshy Nıkolaı Kovtalıýkti qulatqan «Aqtóbe» sapyndaǵy chehııalyq qorǵaýshy Mıhal Ierabek alańnan qýyldy.
Osy jeńisten keıin 9 upaı jınaǵan «Aqjaıyq» týrnır kestesinde toǵyzynshy orynǵa kóterildi.
Oraldyqtar kelesi oıynyn 28 sáýir kúni elordada chempıonatta 17 upaımen jekedara kósh bastap kele jatqan «Astanamen» ótkizedi.
Búgin sondaı-aq Petropavlda jergilikti «Qyzyljar» Taldyqorǵannyń «Jetisý» komandasyn 3:0 esebimen oısyrata utty. Munda belorýssııalyq qorǵaýshy Valerıı Karshakevıch esep ashsa, Álibek Qasym ádemi gol soǵyp, 2:0-ge jetkizdi. Ekinshi taımda brazılııalyq Danılo Almeıda
kezdesý núktesin qoıdy.
«Qyzyljar» 10 upaımen altynshy orynǵa shyqsa, jalǵyz-aq upaıy bar «Jetisý» kósh sońynda keledi.
Eske sala keteıik , budan buryn «Tobyl» «Turandy» iri eseppen jeńgenin jazǵan bolatynbyz.
Foto: Aıbatyr Nurash
